Üç turnir, 108 komanda
Klub turnirlərinin 2024-2025 mövsümündə liqa raundları yetişib. UEFA-nın yarışlara buraxdığı 236 komandanın 128-i təsnifatlarda ələnib, Çempionlar Liqası, Avropa Liqası və Konfrans Liqasının hər birində 36 komanda qalıb. Rusiya yarışlardan kənardır, 14 ölkə, o cümlədən Litva, Estoniya, Gürcüstan təmsilçilərini itirib.
Çempionlar Liqası və Avropa Liqasının liqa raundlarında komandalar 8 oyun (4-ü evdə, 4-ü səfərdə), Konfrans Liqasının liqa raundunda 6 oyun (3-ü evdə, 3-ü səfərdə) keçirəcək, ilk 8 pilləni tutan komandalar 1/8 finala, 9-24-cü yerləri tutan komandalar 1/16 finala çıxacaq.
Azərbaycan bir təmsilçisi ilə yarışır.
“Zirə” əvvəl Avropa Liqasının birinci mərhələsində, sonra Konfrans Liqasının dördüncü mərhələsində dayanıb, “Sumqayıt” Konfrans Liqasının ikinci, “Sabah” üçüncü raundunda büdrəyib.
Yola Çempionlar Liqasının ikinci mərhələsində çıxan “Qarabağ” dördüncü raundda Avropa Liqasına yuvarlanıb.
Komanda əvvəllər 19 dəfə UEFA-nın əsas klub turnirlərinə vəsiqə əldə edib, 2014-cü ildən başlayaraq təsnifat mərhələlərini keçib, 6 mövsüm Avropa Liqasının qrup mərhələsində, 1 mövsüm Çempionlar Liqasının qrup mərhələsində, 2 mövsüm Konfrans Liqasının 1/16 finalında, 1 mövsüm Avropa Liqasının 1/8 finalında ələnib.
Azərbaycan 55 üzvü olan UEFA-nın klub reytinqində 26-cı pillədədir. Reytinq turnirlərin son beş mövsümündə qazanılan əmsallara əsaslanır. Təsnifat mərhələlərində qələbə 1 xal, heç-heçə yarım xal, sonrakı raundlarda qələbə 2 xal, heç-heçə 1 xaldır. Liqa mərhələsindən başlayaraq finala qədər bonus xalları da var.
Toplanan xallar qitə turnirlərinə vəsiqə almış ölkə klublarının sayına bölünür və mində bir dəqiqliklə əmsal çıxarılır. Azərbaycan bu mövsüm 2,375 əmsal qazanıb.
