BRİCS+ arayışı
Azərbaycanın Xarici İşlər Nazirliyi ölkənin BRİCS+ təşkilatına qoşulması üçün rəsmi müraciət edib.
Qurumu 2006-cı ildə Braziliya, Rusiya, Hindistan, Çin yaradıb, üzv ölkələrin ingiliscə adlarının ilk hərflərinə uyğun BRİC qısaltması seçilib.
2011-ci ildə Cənubi Afrika Respublikası qoşulandan təşkilat BRİCS adlanıb.
2024-cü ildən Misir, Efiopiya, İran və Birləşmiş Ərəb Əmirliklərinin də daxil olduğu qurum BRİCS+ kimi tanınır.
BRİCS+ təşkilatının nizamnaməsi, strukturu, rəhbərliyi, mənzil-qərargahı yoxdur, hər üzv bir il sədrlik edir, fəaliyyət zirvə sammitlərində qəbul olunmuş sənədlərə əsaslanır.
Qurumun əsas məramları kimi qlobal idarəçilik institutlarında (o cümlədən BMT-də) islahatlara, çoxqütblü dünyanın formalaşdırılmasına nail olunması, üzv ölkələr arasında ticarət, sərmayə əlaqələrinin gücləndirilməsi, yüksək texnologiyaların inkişafı və iqtisadi proseslərə maksimum tətbiqi və s. göstərilir.
