Son raund ərəfəsi
Klub turnirlərinin 2024-2025 mövsümündə üç təsnifat raundu bitib, UEFA-nın yarışlara buraxdığı 236 komandanın 104-ü mübarizəni dayandırıb, Çempionlar Liqasında 43, Avropa Liqasında 41, Konfrans Liqasında 48 komanda qalıb.
Son ələmə mərhələsində Azərbaycan iki təmsilçisi ilə yarışır.
Avropa Liqasının birinci mərhələsindən Konfrans Liqasına ələnən “Zirə” turnirdə iki raund adlayıb.
“Qarabağ” Çempionlar Liqasına ikinci mərhələdə qoşularaq iki raundu keçib.
“Sumqayıt” Konfrans Liqasının ikinci, “Sabah” üçüncü raundunda büdrəyib.
Hər üç turnirdə liqa raundu 36 komanda ilə oynanacaq. Çempionlar Liqası və Avropa Liqasının liqa raundlarında komandalar 8 matç (4-ü evdə, 4-ü səfərdə), Konfrans Liqasının liqa raundunda 6 oyun (3-ü evdə, 3-ü səfərdə) keçirəcək, ilk 8 pilləni tutan komandalar 1/8 finala, 9-24-cü yerləri tutan komandalar 1/16 finala çıxacaq.
Azərbaycan 55 üzvü olan UEFA-nın klub reytinqində 26-cı pillədədir. Reytinq turnirlərin son beş mövsümündə qazanılan əmsallara əsaslanır. Təsnifat mərhələlərində qələbə 1 xal, heç-heçə yarım xal, sonrakı raundlarda qələbə 2 xal, heç-heçə 1 xaldır. Liqa mərhələsindən başlayaraq finala qədər bonus xalları da var.
Toplanan xallar qitə turnirlərinə vəsiqə almış ölkə klublarının sayına bölünür və mində bir dəqiqliklə əmsal çıxarılır. Azərbaycan bu mövsüm 2,125 əmsal qazanıb.
