Maduro postunu qoruyur
Venesuelada iyulun 28-də keçirilmiş prezident seçkisinin ilkin nəticələri açıqlanıb. Milli Seçki Şurasının hesabatına görə, dövlət başçısı Nikolas Maduro 51,2 faiz səslə önə çıxır. Əsas müxalif namizəd Edmundo Qonsales 44,2 faiz səslə göstərilir, qalan səkkiz iddiaçı ümumilikdə 4,6 faiz dəstək alır.
1962-ci il təvəllüdlü Nikolas Maduro Venesuela Vahid Sosialist Partiyasının lideridir. Parlament sədri, xarici işlər naziri, vitse-prezident postlarını tutub. 2013-cü il martın 5-dən prezident səlahiyyətlərini icra edib, həmin il aprelin 14-də və 2018-ci il mayın 20-də dövlət başçısı seçilib.
Venesuelada eyni şəxsin prezident seçilməsinə məhdudiyyət yoxdur.
