![]({"full":{"0":"2022\/07\/Avro.jpg","1":800,"2":450,"3":false,"file":"https:\/\/novator.az\/wp-content\/uploads\/2022\/07\/Avro.jpg"}})
Avropa İttifaqı 2019-2024-cü illərdə Gürcüstanın 170 qeyri-hökumət təşkilatının ümumilikdə 47 layihəsinə 46,1 milyon avro qrant ayırıb. Rəsmi hesabata görə, vəsait bu istiqamətli layihələri əhatə edib: insan haqları və gender bərabərliyi – 8,6 milyon avro, demokratik iştirakçılıq və azad media – 8 milyon avro, biznesin inkişafı və peşə təhsili – 7,9 milyon avro, təhlükəsizlik sektorunda islahatların təşviqi – 4,9 milyon avro, mədəniyyət və yaradıcılıq – 4,6 milyon avro, münaqişələrin həlli üçün etimadın bərpası – 4 milyon avro, əks-mərkəzləşmə və kəndin inkişafı – 3,9 milyon avro, ətraf mühit və iqlim – 2 milyon avro, dövlət idarəçiliyində islahatların təşviqi – 1,2 milyon avro, hüquq və məhkəmə sistemi – 1 milyon avro.
Gürcüstan hökuməti hesab edir ki, xarici qrantların əhəmiyyətli qismi siyasi müxalifətin qanunsuz maliyyələşməsinə yönəlir. 2024-cü il iyunun 3-ü ölkədə “Xarici təsirin şəffaflığı haqqında” qanun imzalanıb. Qanuna əsasən, illik gəlirinin 20 faizindən çoxu xaricdən gələn qeyri-hökumət təşkilatı və media quruluşu reyestrdə qeydiyyatdan keçməli, ildə bir yol maliyyə bəyannaməsi verməlidir. Bu qaydanın pozulması cərimə cəzası nəzərdə tutur.
Əsası 1957-ci ildə qoyulan Avropa İttifaqının 27 üzvü var: Almaniya, Avstriya, Belçika, Bolqarıstan, Çexiya, Danimarka, Estoniya, Finlandiya, Fransa, Xorvatiya, İrlandiya, İspaniya, İsveç, İtaliya, Kipr, Latviya, Litva, Lüksemburq, Macarıstan, Malta, Niderland, Polşa, Portuqaliya, Rumıniya, Slovakiya, Sloveniya, Yunanıstan.
Türkiyə, Şimali Makedoniya, Monteneqro, Serbiya, Albaniya, Moldova, Ukrayna, Bosniya və Herseqovina, Gürcüstan Avropa İttifaqına namizəd statusundadır.