Seçki yarışında yeni mərhələ
Donald Tramp Respublikaçılar Partiyasından ABŞ prezidentliyinə namizəd statusu alıb. Rəsmi qərar iyulun 15-i partiyanın qurultayında çıxarılıb.
1946-cı il iyunun 14-də doğulan Donald Tramp Pensilvaniya Universitetinin Uorton Biznes Məktəbini bitirib. Respublikaçılar Partiyasına 1999-cu ildə qoşulub. 2017-ci il yanvarın 20-dən 2021-ci il yanvarın 20-dək ölkə prezidenti olub.
Prezidentliyə Demokratlar Partiyasından dövlət başçısı Cozef Bayden iddia edir. Partiyanın qurultayı avqust ayında keçiriləcək.
Cozef Bayden 1942-ci il noyabrın 20-də doğulub. Delaver Universitetini və Sirakus Universitetinin Hüquq Məktəbini bitirib.
1972, 1978, 1984, 1990, 1996, 2002 və 2008-ci illərdə Senatın üzvü seçilib.
2009-2017-ci illərdə vitse-prezident postunu tutub, 2021-ci il yanvarın 20-dən prezidentdir.
Prezident seçkisinin ilk raundu noyabrın 5-də olacaq, 50 ştat və 1 federal dairədən xüsusi nümayəndələr – Seçicilər Kollegiyası seçiləcək. Ümumxalq səsverməsindən sonra Seçicilər Kollegiyası prezidenti seçməli, bu barədə qərar Konqresin (Nümayəndələr Palatası və Senat) iclasında təsdiqlənməlidir.
Prezident seçilmək üçün 538 nümayəndədən 270-nin səsini qazanmaq lazımdır.
ABŞ Konstitusiyasına görə, eyni şəxs yalnız iki dəfə prezident seçilə bilər.
Prezidentlə birgə seçilən vitse-prezident Konqresin yuxarı palatası olan Senata sədrlik edir. Dövlət başçısı vəzifədən vaxtından əvvəl getdikdə onun səlahiyyətləri vitse-prezidentə keçir.
Hazırda vitse-prezident postunu Kamala Harris tutur. O, 2024-cü ilin seçkisinə də qatılmalıdır. Kamala Harris 1964-cü il oktyabrın 20-də doğulub. Atası yamaykalı, anası hindistanlıdır. İqtisadiyyat, siyasi elmlər və hüquq üzrə ali təhsil alıb. Prokurorluq sistemində məsul vəzifələr tutub, Senatın üzvü olub.
Respublikaçıların vitse-prezident postuna namizədi senator Ceyms Devis (Cey Di) Vensdir.
