Seçki nöqtəsi
İranda növbədənkənar prezident seçkisi başa çatıb. İyulun 5-də keçirilmiş ikinci turda parlament üzvü Məsud Pezeşkian 16,3 milyon səs toplayaraq Sistemin Məsləhətini Müəyyənləşdirən Qurumun üzvü Səid Cəlilini xeyli qabaqlayıb.
İlk turda (28 iyun) Məsud Pezeşkianla Səid Cəlili önə çıxmış, parlament sədri Məhəmmədbağır Qalibaf, sabiq daxili işlər və ədliyyə naziri Mustafa Purməhəmmədi ələnmişdi.
1954-cü il təvəllüdlü Məsud Pezeşkian həkimdir. Təbriz Tibb Universitetinin rektoru, səhiyyə naziri, parlament sədrinin birinci müavini olub.
2021-ci il avqustun 5-dən prezident postunu tutan İbrahim Rəisi mayın 19-da vertolyot qəzasında həlak olub, prezident səlahiyyətləri birinci vitse-prezident Məhəmməd Müxbirə ötürülüb.
Hökumət başçısı funksiyası daşıyan İran prezidenti 4 il müddətinə seçilir. Prezident vəzifəsinin yaradıldığı 1980-ci ildən bəri həmin kürsünü bu şəxslər də tutub: Əbülhəsən Bənisədr, Məhəmmədəli Rəcai, Əli Xamneyi, Haşimi Rəfsəncani, Məhəmməd Xatəmi, Mahmud Əhmədinejad, Həsən Ruhani.
İranın ali rəhbəri (dövlət başçısı) Əli Xamneyidir.
