Şahbaz Xuduoğlu təzminat alacaq
Avropa İnsan Hüquqları Məhkəməsi “Qanun” jurnalının sahibi Şahbaz Xuduoğlunun şikayəti üzrə qərarını açıqlayıb.
2013-cü ildə vergi məmurları jurnalın Bakıdakı redaksiyasına reyd edib, mühasibat sənədləri, kompüterlər, bir çox əşya götürülüb, ardınca nəşrə 47 min manata yaxın vergi borcu yazılaraq bank hesabı dondurulub. Yerli məhkəmələr həmin qərardan şikayətləri təmin etməyib.
Aihmaz.org-un 4 iyul məlumatına görə, Avropa İnsan Hüquqları Məhkəməsi bu işdə Avropa İnsan Hüquqları Konvensiyası ilə qorunan şəxsi həyata hörmət və mülkiyyət hüquqlarının pozulduğu qənaətinə gəlib. Qərar Azərbaycan dövlətinin ərizəçiyə 13500 avro təzminat ödəməsini nəzərdə tutur.
Fransanın Strasburq şəhərində yerləşən, hakimləri Avropa Şurasına üzv ölkələrdən seçilən Avropa Məhkəməsi Avropa İnsan Hüquqları Konvensiyasına riayət olunmasına nəzarət edir. Azərbaycan 1949-cu ildə yaradılmış Avropa Şurasına 2001-ci ildə qoşulub, 2002-ci ildən Avropa Məhkəməsinin təsir dairəsindədir.
