Millətlər Liqasının formatı
UEFA Millətlər Liqasında 2024-2025 mövsümünün qrup mərhələsi sentyabr-noyabr aylarında oynanacaq. Turnirə 54 milli komanda qatılır. A, B, C liqalarında 16 komanda dörd qrupa, D liqasında 6 komanda iki qrupa bölünüb.
Reqlamentə görə, A liqası qruplarında ilk iki yeri tutmuş komandalar 1/4 finala çıxır, həmin mərhələnin qalibləri final raundunda yarışır. 1/4 final matçları 2025-ci ilin martına, yarımfinallar və final iyun ayına təyin olunub.
B, C, D liqalarının qrup qalibləri yuxarı liqaya yüksəlir, A, B liqalarının qrup sonuncuları və C liqasının iki zəif komandası aşağı liqaya düşür.
A və B liqası qruplarında üçüncü yeri tutmuş komandalar aşağı liqa qruplarında ikinci olmuş komandalarla, C liqası qruplarında sonuncu yeri tutmuş, nəticələri yüksək olan komandalar D liqası qruplarında ikinci olmuş komandalarla düşmə/yüksəlmə oyunlarına çıxır.
Azərbaycan C liqasının 1-ci qrupunda yer alır. Rəqiblər İsveç, Slovakiya və Estoniyadır.
Millətlər Liqası 2018-ci ildən keçirilir. 2018-2019 mövsümündə Portuqaliya, 2020-2021 mövsümündə Fransa, 2022-2023 mövsümündə İspaniya zəfər çalıb.
