Altıncı təyinat
İyulun 1-də sərəncam imzalayan dövlət başçısı İlham Əliyev Bəşir Hacıyevi Kəlbəcər rayonunda prezidentin xüsusi nümayəndəsi təyin edib.
19 yanvar 2021-ci ildə yaradılan prezidentin xüsusi nümayəndəlikləri Prezident Administrasiyasının struktur bölməsi sayılır.
Hazırda daha beş xüsusi nümayəndə var: Aydın Kərimov Şuşa rayonuna, Emin Hüseynov Ağdam, Füzuli və Xocavənd rayonlarına, Elçin Yusubov Xankəndi şəhərinə, Ağdərə və Xocalı rayonlarına, Vahid Hacıyev Cəbrayıl, Qubadlı və Zəngilan rayonlarına, Məsim Məmmədov Laçın rayonuna məsuldur.
Ermənistan 1988-1994-cü illərin təcavüzündə Azərbaycanın cənub-qərbini və Sədərək rayonunun 1, Qazax rayonunun 7 kəndini işğal edib, Qarabağda separatçı rejim qurub.
2020-ci il sentyabrın 27-dən noyabrın 10-dək Azərbaycanın apardığı müharibə və savaşdan sonrakı danışıqlar, lokal hərbi əməliyyatlar nəticəsində Cəbrayıl, Füzuli, Zəngilan, Qubadlı, Ağdam, Kəlbəcər, Laçın rayonları tam, Şuşa, Xocavənd, Xocalı, Ağdərə rayonları qismən azad olunub.
2023-cü il sentyabrın 19-da Azərbaycan Xankəndi, Xocalı, Ağdərə, Xocavənd şəhərləri, Şuşa, Xocalı, Xocavənd və Ağdərə rayonlarının bir hissəsinə nəzarət edən işğalçı rejimə qarşı hərbi əməliyyata başlayıb, ertəsi gün rejim tərksilah olmaq öhdəliyi götürüb, sentyabrın 24-dən ermənilərin Qarabağdan kütləvi köçü başlayıb, sentyabrın 28-də rejim özünü buraxıb.
2024-cü il mayın 24-də Ermənistan Qazaxın Aşağı Əskipara, Bağanıs Ayrım, Xeyrimli, Qızılhacılı kəndlərindən çəkilib.
Sədərəkin Kərki, Qazaxın Barxudarlı, Sofulu, Yuxarı Əskipara kəndləri Ermənistan ərazisi ilə əhatə olunmuş (anklav) vəziyyətdədir.
