Konstitusiya Məhkəməsindən yaşıl işıq
Konstitusiya Məhkəməsinin Plenumu iyunun 27-də prezidentin sorğusuna baxaraq Milli Məclisin buraxılmasına və növbədənkənar parlament seçkisi təyin olunmasına yaşıl işıq yandırıb. Qərara görə, buraxılan parlament bəzi səlahiyyətlərini, o cümlədən hərbi vəziyyət, fövqəladə vəziyyət tətbiqi barədə fərmanların təsdiqi, Silahlı Qüvvələrin təyinatı ilə bağlı olmayan vəzifələrin icrasına cəlb edilməsinə razılıq verilməsi, müharibə elan edilməsinə və sülh bağlanmasına razılıq verilməsi səlahiyyətlərini saxlayır.
Dövlət müstəqilliyi 1991-ci ildə bərpa olunan Azərbaycanda 6 parlament seçkisi keçirilib. 1995-ci ilin seçkisi noyabrın ikinci bazar gününə, 2000, 2005, 2010 və 2015-ci illərin seçkiləri noyabrın birinci bazar gününə düşüb.
Milli Məclisin səlahiyyət müddəti 5 ildir.
2016-cı ildə prezident Milli Məclisi buraxmaq səlahiyyəti alıb, 2019-cu il dekabrın 5-də bu hüququndan istifadə edib və altıncı parlament növbədənkənar səsvermədə – 2020-ci il fevralın 9-da seçilib.
Növbəti parlament seçkisinin 2024-cü il noyabrın 3-də keçirilməsi gözlənirdi. Ancaq prezident İlham Əliyevin sədrlik etdiyi Yeni Azərbaycan Partiyasının təşəbbüsünü nəzərə alan parlament dövlət başçısına 21 iyun müraciətində Milli Məclisin buraxılmasını və növbədənkənar seçki təyin olunmasını istəyib.
Milli Məclisin buraxılması halında parlament seçkisi 60 gün ərzində keçirilməlidir.
Parlament 125 deputatdan ibarətdir, onların hamısı seçki dairələrindən mandat alır. Seçkidə iştirak edən seçicilərin ən çox səsini toplamış namizəd deputat seçilmiş sayılır.
Parlament seçkisinin dolaşıq tarixi
