Culian Assanj həbsdən çıxdı
“Vikiliks” saytının yaradıcısı Culian Assanj cəzadan qurtulur. İyunun 25-də yayılan məlumata görə, ötən gün Böyük Britaniyanın paytaxtı Londonda azadlığa buraxılan Culian Assanj ABŞ-ın prokurorluq orqanları ilə razılaşmaya gedib. Razılaşmaya əsasən, Culian Assanj özünü qismən təqsirli bilir və jurnalistin həbsdə keçirdiyi müddət cəza üçün yetərli sayılır.
Avstraliya vətəndaşı olan Culian Assanjın 2006-cı ildə qurduğu “Vikiliks” ABŞ Dövlət Departamentinin məxfi sənədlərini dərc etməklə populyarlaşıb. ABŞ-da buna görə Culian Assanja cinayət işi qaldırılıb.
2010-cu il dekabrın 7-də Culian Assanj Londonda tutulub. Bu həbsin jurnalistə İsveçdə qaldırılmış, zorlama ittihamlı cinayət işi ilə bağlı olduğu açıqlanıb. Dekabrın 14-də Culian Assanj pul girovu müqabilində azadlığa buraxılıb. 2011-ci il fevralın 24-də məhkəmə onun İsveçə təhvil verilməsi haqda qərar çıxarıb, bu iş 2012-ci ilin iyun ayınadək uzanıb. Culian Assanj həmin il iyunun 19-da Ekvadorun Londondakı səfirliyinə sığınıb və o vaxtdan orada yaşayıb.
2019-cu ilin aprel ayında Ekvador hökuməti siyasi sığınacağın başa çatdığını bəyan edib və Culian Assanjın səfirlikdən çıxmasını istəyib. Aprelin 11-də polis əməkdaşları Ekvadorun Londondakı səfirinin dəvəti ilə diplomatik nümayəndəliyə gələrək jurnalisti tutublar.
Culian Assanjın həbsinin ABŞ-da və İsveçdə qaldırılmış cinayət işləri ilə bağlı olduğu açıqlanıb. Mayın 1-də Londonda ilkin məhkəmə Culian Assanja 50 həftə azadlıqdan məhrumetmə cəzası kəsib. Jurnalist girovla azadlığa buraxılmaq şərtlərini pozmaqda təqsirli bilinib. Cəza başa çatandan sonra jurnalist həbsdə saxlanıb.
2019-cu ilin noyabrında İsveçdəki cinayət işinə xitam verilib.
2021-ci il dekabrın 10-da Londonda ilkin məhkəmə Culian Assanjın ABŞ-a təhvil verilməsi qərarı çıxarıb, yuxarı məhkəmələr bunu təsdiqləyib. 2022-ci il iyunun 17-də Böyük Britaniyanın daxili işlər naziri Culian Assanjın ABŞ-a təhvil verilməsi qərarını rəsmiləşdirib, ancaq apellyasiya şikayəti verildiyi üçün icra təxirə salınıb.
