Qaçaqmalçılıq işində kimlər var?
Azərbaycana xarici valyuta gətirilməsi adı ilə məsuliyyətə cəlb edilən jurnalist və ictimai fəalların sayı 20-yə çatıb. Cinayət işləri bir qrup şəxsin qaçaqmalçılıq törətməsi ittihamı (5 ildən 8 ilədək müddətə azadlıqdan məhrumetmə cəzası nəzərdə tutur) üzrə aparılır.
Novator.az bildirir ki, “Abzas Media” saytının direktoru Ülvi Həsənli və onun köməkçisi Məhəmməd Kekalov 2023-cü il noyabrın 20-də, baş redaktoru Sevinc Vaqifqızı noyabrın 21-də, əməkdaşı Nərgiz Absalamova noyabrın 30-da, bu media qurumu ilə əməkdaşlıq edən jurnalist Hafiz Babalı dekabrın 13-də tutulublar.
“Abzas Media”nın əməkdaşı Elnarə Qasımova 2024-cü il yanvarın 13-də, Meclis.info saytının rəhbəri İmran Əliyev aprelin 18-də, Seçkilərin Monitorinqi və Demokratiyanın Tədrisi Mərkəzinin sədri Anar Məmmədli aprelin 29-da, iqtisadçı Fərid Mehralızadə mayın 30-da həbs ediliblər.
İstintaqı aparan Bakı Şəhər Baş Polis İdarəsi İmran Əliyevə təkrar qaçaqmalçılıq ittihamı (cəzası 5 ildən 8 ilədək müddətə azadlıqdan məhrumetmədir) da irəli sürüb.
Martın 6-da Bakı Şəhər Baş Polis İdarəsi Toplum.tv informasiya resursu, III Respublika Platforması və Demokratik Təşəbbüslər İnstitutuna bağlı bəzi şəxsləri tutub. Demokratik Təşəbbüslər İnstitutunun rəhbəri Akif Qurbanov, Toplum.tv-dən Əli Zeynal, İlkin Əmrahov, Müşfiq Cabbar, Ramil Babayev barəsində həbs qətimkan tədbirləri seçilib, Fərid İsmayılov və Elmir Abbasov polis nəzarətinə verilib.
Martın 8-də Toplum.tv-nin təsisçisi Ələsgər Məmmədli və III Respublika Platformasının üzvü Ruslan İzzətli də tutulublar, hər iki şəxs barəsində həbs qətimkan tədbiri seçilib.
“Kanal 13” internet televiziyasının direktoru Əziz Orucov 2023-cü il noyabrın 27-dən həbsdədir. Ona əvvəlcə mülkiyyət, istifadə və ya icarə hüququ olmadan torpaq sahəsi üzərində özbaşına tikinti aparma ittihamı (1 ildən 3 ilədək müddətə azadlığın məhdudlaşdırılması və ya 1 ildən 3 ilədək müddətə azadlıqdan məhrumetmə ilə cəzalandırılır) verilib, sonra işə qabaqcadan əlbir olan bir qrup şəxsin qaçaqmalçılıq törətməsi ittihamı əlavə edilib.
“Kanal 13”lə əməkdaşlıq edən jurnalist Şamo Eminov 2023-cü il dekabrın 22-də tutulub. O da qabaqcadan əlbir olan bir qrup şəxsin qaçaqmalçılıq törətməsində şübhəli bilinir.
