![]({"full":{"0":"2021\/12\/Shalva-Papuashvili.jpg","1":754,"2":421,"3":false,"file":"https:\/\/novator.az\/wp-content\/uploads\/2021\/12\/Shalva-Papuashvili.jpg"}})
Gürcüstan parlamentinin sədri Şalva Papuaşvili “Xarici təsirin şəffaflığı haqqında” qanunu imzalayıb. Rəsmi məlumat iyunun 3-də yayılıb.
Müxalif qüvvələr, ictimai fəallar və beynəlxalq birliyin pislədiyi qanuna əsasən, illik gəlirinin 20 faizindən çoxu xaricdən gələn qeyri-hökumət təşkilatı və media quruluşu reyestrdə qeydiyyatdan keçməli, ildə bir yol maliyyə bəyannaməsi verməlidir. Bu qaydanın pozulması cərimə cəzası nəzərdə tutur.
2023-cü ildə gündəmə gələn, parlamentin 2024-cü il mayın 14-də qəbul etdiyi layihə prezident Salome Zurabişvilinin vetosuna dirənmiş, buna görə mayın 28-də daha bir səsvermədən keçmişdi.
Gürcüstan Konstitusiyası parlament sədrinə prezidentin imzalamadığı layihələri rəsmiləşdirmək hüququ verir.
Parlament respublikası olan Gürcüstanda hökuməti qanunverici orqanda çoxluq əldə edən partiya formalaşdırır. 2012, 2016 və 2020-ci illərin parlament seçkilərində Gürcü Arzusu – Demokratik Gürcüstan Partiyası qalib gələrək hökumət qurub.
6 il müddətinə seçilən prezident dövlət başçısı funksiyasını yerinə yetirir. Salome Zurabişvili 2018-ci ildə hakim partiyanın namizədi kimi prezident postuna mandat alıb. 2022-ci ildən bəri hakim partiya ilə prezident arasında davamlı ziddiyyətlər yaşanır.