Separatçılara amnistiya
İspaniya parlamentinin aşağı palatası katalon separatçılara amnistiya layihəsini qəbul edib. Mayın 30-da səsvermədən keçən qanun Kataloniya vilayətinin İspaniyadan ayrılmasına görə cinayət məsuliyyətinə cəlb olunmuş 300-dən çox məmur və fəalın bağışlanmasını nəzərdə tutur.
Kataloniya 1979-cu ildə muxtar vilayət statusu alıb. Bölgədə 2017-ci il oktyabrın 1-də keçirilmiş referendumda Kataloniyanın müstəqil dövlət elan olunmasına səs verilib. Oktyabrın 27-də Kataloniya parlamenti müstəqillik qətnaməsi qəbul edib. Oktyabrın 28-də Kataloniya hökuməti və parlamenti buraxılıb, idarəçilik səlahiyyətləri mərkəzi orqanlara ötürülüb. Kataloniya hakimiyyətində yer almış bir çox şəxs üsyan və qiyam təşkili, vəzifə səlahiyyətlərindən sui-istifadə, hakimiyyət orqanlarına tabe olmamaq, dövlət vəsaitini mənimsəmə ittihamları ilə həbs edilib, bəzi separatçılar ölkədən qaçıb.
2023-cü il iyulun 23-ü İspaniyada parlament palatalarına seçkilər keçirilib. 350 nəfərlik aşağı palataya seçkidə müxalif Xalq Partiyası önə çıxıb, baş nazir Pedro Sançesin Sosialist Fəhlə Partiyası ikinci yeri tutub. 2018-ci il iyunun 1-dən baş nazirlik edən Pedro Sançes yenidən hökumət qurmaq üçün katalonları birləşdirən partiyalarla əməkdaşlığa da vadar olub, bu zaman Kataloniya separatçılarına amnistiya tətbiqi şərti gündəmə gəlib.
