Bəraət
Ermənistanın paytaxtı Yerevanda birinci instansiya məhkəməsi sabiq prezident Serj Sərkisyana və daha iki şəxsə bəraət verib. Qərar mayın 31-də çıxarılıb.
2019-cu ilin dekabr ayında irəli sürülmüş ittihama əsasən, Serj Sərkisyan 2013-cü ildə prezident vəzifəsini tutarkən bir qrup şəxsin kənd təsərrüfatı işləri üçün dizel yanacağını şişirdilmiş qiymətə almasını, xüsusilə külli miqdarda dövlət vəsaitini ələ keçirməsini təşkil edib. İttiham olunan beş nəfərin ikisi vəfat etdiyi üçün onların işinə xitam verilmişdi.
1954-cü il təvəllüdlü Serj Sərkisyan Azərbaycana qarşı işğalçı müharibənin qaniçən liderlərindən biridir. 1989-cu ildən Dağlıq Qarabağ separatçılarının komandanı, 1993-cü ildən Ermənistanın müdafiə naziri olub.
1995-2008-ci illərdə Serj Sərkisyan Dövlət Təhlükəsizliyi İdarəsinin rəisi (sonradan milli təhlükəsizlik naziri), daxili işlər və milli təhlükəsizlik naziri (sonradan yenə milli təhlükəsizlik naziri), Prezident Aparatının rəhbəri, Milli Təhlükəsizlik Şurasının katibi (eyni zamanda müdafiə naziri), baş nazir kürsülərini tutub.
2008 və 2013-cü illərdə prezident seçilib.
2007-ci ildən Ermənistan Respublikaçılar Partiyasının sədridir.
Serj Sərkisyan 2018-ci il aprelin 9-dək prezident postunu tutub, aprelin 17-si parlamentdə baş nazir seçilib və prezident sərəncamı ilə bu posta təsdiqlənib, ancaq aprelin 23-də xalq etirazlarına görə istefa verməyə məcbur olub.
