Gürcüstan: hökumət layihəsi qanun olur
“Xarici təsirin şəffaflığı haqqında” qanun layihəsi Gürcüstan parlamentində daha bir mərhələni keçib.
Layihə 2023-cü il martın 7-də ilk oxunuşda qəbul edilmiş, ancaq martın 9-da etirazlar üzündən geri götürülmüşdü. Bu ilin aprelində layihə yenidən parlament müzakirəsinə çıxarılıb və mayın 14-də son oxunuşda qəbul edilib. Prezident Salome Zurabişvili layihəyə veto qoyduğu üçün mayın 28-də parlament daha bir səsvermə keçirib və qanuna yaşıl işıq yandırıb.
Hökumətin təşəbbüsü olan sənədə görə, illik büdcəsinin 20 faizindən çoxu xarici vəsait hesabına formalaşan qeyri-hökumət təşkilatı və media quruluşu reyestrdə qeydiyyatdan keçməli, ildə bir yol maliyyə bəyannaməsi verməlidir. Bu qaydanın pozulması cərimə cəzası nəzərdə tutur.
Müxalif qüvvələr, ictimai fəallar və beynəlxalq birlik hesab edir ki, yenilik demokratik prinsiplərə ziddir.
Parlament respublikası olan Gürcüstanda hökuməti qanunverici orqanda çoxluq əldə edən partiya formalaşdırır. 2012, 2016 və 2020-ci illərin parlament seçkilərində Gürcü Arzusu – Demokratik Gürcüstan Partiyası qalib gələrək hökumət qurub.
6 il müddətinə seçilən prezident dövlət başçısı funksiyasını yerinə yetirir. Salome Zurabişvili 2018-ci ildə hakim partiyanın namizədi kimi prezident postuna mandat alıb. 2022-ci ildən bəri hakim partiya ilə prezident arasında davamlı ziddiyyətlər yaşanır.
