Məşğulluq, işsizlik, pensiya
2024-cü ilin ilk rübü Azərbaycanda 22,5 min yeni iş yeri açılıb. Hesabatı yayan Dövlət Statistika Komitəsi bağlanan iş yerlərinin sayını 2,5 min göstərir.
Rəsmi açıqlamaya əsasən, mayın 1-nə iqtisadi fəal əhalinin sayı 5 milyon 260,1 min nəfər olub, onların 4 milyon 973,1 min nəfəri məşğul şəxs kimi rəsmiləşib.
Aprelin 1-nə 1 milyon 748,9 min nəfərin muzdla çalışdığı, mayın 1-nə 209,1 min nəfərin işsiz kimi qeydiyyatdan keçdiyi bildirilir.
Hesabata görə, aprelin 1-nə ölkədə 1 milyon 97,3 min nəfər pensiyaçı olub. Bu, ilin əvvəli ilə müqayisədə 1,3 min nəfər çoxdur.
2010-cu ilə ölkədə 1 milyon 308,4 min, 2011-ci ilə 1 milyon 292,2 min, 2012-ci ilə 1 milyon 277,6 min, 2013-cü ilə 1 milyon 272,1 min, 2014-cü ilə 1 milyon 277,1 min, 2015-ci ilə 1 milyon 290,9 min, 2016-cı ilə 1 milyon 299,9 min, 2017-ci ilə 1 milyon 315,2 min, 2018-ci ilə 1 milyon 318,4 min nəfər pensiya alıb.
2019-cu ilə pensiyaçıların sayı 1 milyon 295,5 minə, 2020-ci ilə 1 milyon 270,6 minə, 2021-ci ilə 1 milyon 228,8 minə, 2022-ci ilə 1 milyon 200,5 minə, 2023-cü ilə 1 milyon 114,2 minə, 2024-cü ilə 1 milyon 96 minə enib.
Azərbaycanda minimum pensiya 280 manatdır.
Ölkədə kişilər 65, qadınlar 63 yaş yarımda pensiyaya çıxır. 2027-ci il iyulun 1-dək qadınların da pensiya yaşı 65-ə qalxacaq.
Pensiyaya çıxmaq üçün ya 25 il sığorta stajı, ya da minimum pensiya kapitalı (40320 manat) tələb olunur. 2006-cı il yanvarın 1-dən 2018-ci il iyulun 1-dək hər hansı məbləğdə pensiya kapitalı toplamış şəxsin sosial sığorta stajı avtomatik 25 il hesablanır, əks halda pensiya yaşı çatan şəxsə yaşa görə 220 manat aylıq müavinət verilir.
