Britaniya seçki yolunda
İyulun 4-də Böyük Britaniya parlamentinin alt qanadına – İcmalar Palatasına növbədənkənar seçki keçiriləcək.
Krallıq olan Böyük Britaniya İngiltərə, Şotlandiya, Uels və Şimali İrlandiyanı birləşdirir. Dövlət başçısı kürsüsünü kral III Karl tutur, hökumət 650 nəfərlik İcmalar Palatasına seçkinin nəticələri əsasında qurulur.
Hazırda hakim Mühafizəkarlar Partiyası İcmalar Palatasında 344, ana müxalifət – Leyboristlər Partiyası 205 mandata sahibdir.
Şotland Milli Partiyasının 43, Liberal Demokrat Partiyasının 15, Demokratik Birlik Partiyasının 7 mandatı var.
Qanunverici orqanda daha 8 partiyanın təmsilçiləri və müstəqil deputatlar yer alır.
2022-ci il oktyabrın 25-dən Rişi Sunak baş nazirdir. 1980-ci il təvəllüdlü Rişi Sunak əslən hindistanlıdır. 2015, 2017 və 2019-cu illərdə İcmalar Palatasının üzvü seçilib. 2020-2022-ci illərdə maliyyə naziri olub.
