![]({"full":{"0":"2021\/11\/\u0130brahim-Reisi.jpg","1":797,"2":512,"3":false,"file":"https:\/\/novator.az\/wp-content\/uploads\/2021\/11\/\u0130brahim-Reisi.jpg"}})
İran prezidenti İbrahim Rəisini, başqa rəsmiləri, o cümlədən xarici işlər nazirini Azərbaycan səfərindən qaytaran vertolyotun mayın 19-u ölkənin şimal bölgəsində sərt eniş etdiyi xəbər verilmiş, axtarış-xilasetmə əməliyyatları başlamışdı. Mayın 20-si səhər vertolyotun qəzaya uğrayaraq tam yandığı, bütün heyətin həlak olduğu açıqlanıb.
Rəsmi məlumata görə, prezident səlahiyyətləri birinci vitse-prezident Məhəmməd Müxbirə ötürülüb.
İranın ali rəhbəri (dövlət başçısı) 1939-cu il təvəllüdlü Əli Xamneyidir.
İbrahim Rəisi mayın 19-da Cəbrayıl rayonuna baş çəkmiş, Azərbaycan prezidenti İlham Əliyevlə birgə Araz çayı üzərindəki “Xudafərin” və “Qız Qalası” hidroqovşaqlarının açılış mərasiminə qatılmışdı.
1960-cı ildə doğulmuş İbrahim Rəisi paytaxt Tehranın prokuroru, ölkənin baş prokuroru, Məhkəmə Sisteminin başçısı olub. O, 2021-ci il iyunun 18-də keçirilmiş ümumxalq seçkisində prezident seçilmiş, avqustun 5-də səlahiyyətlərinin icrasına başlamışdı.
Hökumət başçısı funksiyası daşıyan İran prezidenti 4 il müddətinə seçilir. Prezident vəzifəsinin yaradıldığı 1980-ci ildən bəri həmin kürsünü bu şəxslər də tutub: Əbülhəsən Bənisədr, Məhəmmədəli Rəcai, Əli Xamneyi, Haşimi Rəfsəncani, Məhəmməd Xatəmi, Mahmud Əhmədinejad, Həsən Ruhani.