ADR-in fəaliyyəti dayanıb
İqtisadçı alim Qubad İbadoğlunun sədrlik etdiyi Azərbaycan Demokratiya və Rifah (ADR) Partiyası fəaliyyətini dayandırıb. Mayın 14-də verilən qərar qurumun dövlət qeydiyyatının olmaması ilə əsaslandırılıb.
2015-ci ildə yaradılmış Azərbaycan Demokratiya və Rifah Hərəkatının varisi olan ADR Partiyasının təsis qurultayı 2021-ci il oktyabrın 17-də keçirilib. Ədliyyə Nazirliyi partiyanı dövlət qeydiyyatına almayıb, məsələni məhkəmə yolu ilə həll etmək də mümkün olmayıb.
1992-ci ildə qəbul edilmiş “Siyasi partiyalar haqqında” qanun qurumun dövlət qeydiyyatı üçün 1000 üzv tələbi qoyurdu. 2023-cü il yanvarın 11-də qüvvəyə minən yeni qanuna görə, qeydiyyat üçün partiyanın azı 5000 üzvü olmalıdır. Qanun dövlət qeydiyyatına alınmayan partiyanın fəaliyyətini yasaqlayır.
1971-ci il təvəllüdlü Qubad İbadoğlu iqtisad elmləri namizədidir.
Azərbaycan Dövlət İqtisad Universitetində, Budapeştdəki Mərkəzi Avropa Universitetində, ABŞ-ın Kanzas, Şimali Karolina, Dyuk, Prinston, Ratqers universitetlərində, London İqtisadiyyat Məktəbində elmi-pedaqoji fəaliyyətlə məşğul olub.
“Ekonomiks” qəzetinə, “Ekspert” jurnalına baş redaktorluq, İqtisadi Tədqiqatlar Mərkəzinə rəhbərlik edib.
Müsavat Partiyasının rəhbərliyində təmsil olunub. 2015-ci ildə Azərbaycan Demokratiya və Rifah Hərəkatının, 2021-ci ildə Azərbaycan Demokratiya və Rifah Partiyasının sədri seçilib.
2023-cü il iyulun 23-də Qubad İbadoğlu həbs edilib, 2024-cü il aprelin 22-də ev dustaqlığına buraxılıb. Cinayət işi mütəşəkkil dəstənin saxta xarici valyuta hazırlaması, əldə etməsi, satması; dini ekstremist materialları hazırlama, saxlama və ya yayma ittihamları ilə araşdırılır.
