Orta maaş nə qədər artıb?
Dövlət Statistika Komitəsinin hesabatına görə, aprelin 1-nə Azərbaycan iqtisadiyyatında 1 milyon 748,9 min nəfər muzdlu işçi qeydə alınıb, onların orta aylıq nominal əməkhaqqı 2023-cü ilin ilk rübü ilə müqayisədə 9,3 faiz artaraq 985,3 manata çatıb.
Ölkədə pensiyalar orta aylıq nominal əməkhaqqının illik artım tempinə uyğun indeksləşdirilir.
Hazırda minimum pensiya 280 manatdır.
Ölkədə kişilər 65, qadınlar 63 yaş yarımda pensiyaya çıxır. 2027-ci il iyulun 1-dək qadınların da pensiya yaşı 65-ə qalxacaq.
Pensiyaya çıxmaq üçün ya 25 il sığorta stajı, ya da minimum pensiya kapitalı (40320 manat) tələb olunur. 2006-cı il yanvarın 1-dən 2018-ci il iyulun 1-dək hər hansı məbləğdə pensiya kapitalı toplamış şəxsin sosial sığorta stajı avtomatik 25 il hesablanır, əks halda pensiya yaşı çatan şəxsə yaşa görə 220 manat aylıq müavinət verilir.
Aprelin 1-nə Dövlət Sosial Müdafiə Fondunda 1 milyon 97,3 min nəfər pensiyaçı qeydiyyatda olub.
