Final yolçuları
İsveçin Malmö şəhərində keçirilən “Avroviziya 2024” beynəlxalq mahnı müsabiqəsinin ilk yarımfinalı arxada qalıb. 7 may yarımfinalını Finlandiya, Xorvatiya, İrlandiya, Kipr, Litva, Lüksemburq, Portuqaliya, Serbiya, Sloveniya, Ukrayna dəf edib. Azərbaycan təmsilçiləri Fəxri İsmayılov və İlkin Dövlətov ələnib.
9 may yarımfinalında Albaniya, Avstriya, Belçika, Çexiya, Danimarka, Ermənistan, Estoniya, Gürcüstan, İsrail, İsveçrə, Latviya, Malta, Niderland, Norveç, San Marino, Yunanıstan yarışacaq.
Almaniya, Böyük Britaniya, Fransa, İspaniya, İsveç, İtaliya finala (11 may) birbaşa vəsiqə alıb.
İctimai teleradioları cəmləyən Avropa Yayım Birliyinin 1956-cı ildən keçirdiyi “Avroviziya”da İrlandiya və İsveç 7, Niderland, Fransa, Lüksemburq və Böyük Britaniya 5, İsrail 4, Danimarka, İtaliya, Norveç və Ukrayna 3, İsveçrə, Avstriya, İspaniya və Almaniya 2, Monako, Belçika, Yuqoslaviya, Estoniya, Latviya, Türkiyə, Yunanıstan, Finlandiya, Serbiya, Rusiya, Azərbaycan və Portuqaliya 1 dəfə qalib gəlib.
Azərbaycan 13 yarışda finala çıxıb. 2008-ci ildə Elnur Hüseynov və Samir Cavadzadə 8-ci yeri, 2009-cu ildə Aysel Teymurzadə və Araş 3-cü yeri, 2010-cu ildə Səfurə Əlizadə 5-ci yeri, 2011-ci ildə Nigar Camal və Eldar Qasımov 1-ci yeri, 2012-ci ildə Səbinə Babayeva 4-cü yeri, 2013-cü ildə Fərid Məmmədov 2-ci yeri, 2014-cü ildə Dilarə Kazımova 22-ci yeri, 2015-ci ildə Elnur Hüseynov 12-ci yeri, 2016-cı ildə Səmra Rəhimli 17-ci yeri, 2017-ci ildə Diana Hacıyeva 14-cü yeri, 2019-cu ildə Çingiz Mustafayev 8-ci yeri, 2021-ci ildə Samirə Əfəndi 20-ci yeri, 2022-ci ildə Nadir Rüstəmli 16-cı yeri tutub.
2018-ci ildə Aysel Məmmədova, 2023-cü ildə Tural və Turan Bağmanovlar yarımfinalı keçə bilməyiblər.
