Putin yeni mərhələdə
Martın 15-17-də keçirilmiş prezident seçkisini udan dövlət başçısı Vladimir Putin mayın 7-də and içərək yeni səlahiyyət müddətinin icrasına başlayıb, bununla da hökumət istefaya gedib.
Rusiya Konstitusiyasına görə, prezident hökumət sədrini (baş naziri), baş nazirin müavinlərini və nazirləri parlamentin (Federal Məclis) aşağı palatası olan Dövlət Dumasının razılığı ilə təyin edir.
Müdafiə, təhlükəsizlik, daxili işlər, ədliyyə, xarici işlər, fövqəladə hallar, ictimai təhlükəsizlik sahələrinə məsul federal icra orqanlarının rəhbərlərinin təyinatını prezident parlamentin yuxarı palatası olan Federasiya Şurası ilə məsləhətləşmə əsasında aparır.
1952-ci il təvəllüdlü Vladimir Putin 1996-cı ildən Rusiyanın ali hakimiyyət orqanlarında çalışıb, prezidentin işlər müdirinin müavini, Prezident Administrasiyası rəhbərinin birinci müavini, Federal Təhlükəsizlik Xidmətinin direktoru (eyni zamanda Təhlükəsizlik Şurasının katibi) olub.
1999-cu il avqustun 16-da baş nazir təyin edilib. 1999-cu il dekabrın 31-dən həmçinin prezident vəzifəsini icra edib, 2000 və 2004-cü illərdə dörd il müddətinə prezident seçilib.
2008-ci ilin may ayından baş nazir olub, 2012 və 2018-ci illərdə altı il müddətinə prezident mandatı alıb.
Vladimir Putinin 2030-cu ilin prezident seçkisinə də qatılmaq hüququ var.
