Klub reytinqinə nə yenilik gəlir?
2024-2025 mövsümündən UEFA-nın klub reytinqində bonus sistemi dəyişir. Yeniliyə görə, Çempionlar Liqasının liqa mərhələsində ilk 8 pilləni tutan komandalara 12 bonus xalı, 9-16-cı yerləri tutan komandalara 10 bonus xalı, 17-24-cü yerləri tutan komandalara 8 bonus xalı, 25-36-cı yerləri tutan komandalara 6 bonus xalı verilir, 1/8 finaldan başlayaraq hər mərhələ 1,5 bonus xalı qazandırır.
Avropa Liqasının liqa mərhələsində ilk 8 pilləni tutan komandalar 6 bonus xalı, 9-16-cı yerləri tutan komandalar 4 bonus xalı, 17-24-cü yerləri tutan komandalar 2 bonus xalı alır, 1/8 finaldan başlayaraq hər mərhələ 1 bonus xalı gətirir.
Konfrans Liqasının liqa mərhələsində ilk 8 pilləni tutan komandalar üçün 4 bonus xalı, 9-16-cı yerləri tutan komandalar üçün 2 bonus xalı, 17-24-cü yerləri tutan komandalar üçün 1 bonus xalı nəzərdə tutulur, 1/8 finaldan başlayaraq hər mərhələ 0,5 bonus xalına bərabər olur.
UEFA-nın klub reytinqi turnirlərin son beş mövsümündə qazanılan əmsallara əsaslanır. Təsnifat mərhələlərində qələbə 1 xal, heç-heçə yarım xal, sonrakı raundlarda qələbə 2 xal, heç-heçə 1 xaldır. Novator.az bildirir ki, qaydaya əsasən, toplanan xallar qitə turnirlərinə vəsiqə almış ölkə klublarının sayına bölünür və mində bir dəqiqliklə əmsal çıxarılır.
2024-2025 mövsümündən UEFA-nın klub turnirlərində əsas raundlar 36 komandalıq vahid liqa sistemi ilə oynanacaq, Çempionlar Liqası və Avropa Liqasının liqa raundlarında komandalar 8 matç (4-ü evdə, 4-ü səfərdə), Konfrans Liqasının liqa raundunda 6 oyun (3-ü evdə, 3-ü səfərdə) keçirəcək, ilk 8 pilləni tutan komandalar 1/8 finala, 9-24-cü yerləri tutan komandalar 1/16 finala çıxacaq.
Çempionlar Liqası 2024-cü il iyulun 9-da başlayıb 2025-ci il mayın 31-də bitəcək. Finala Almaniyanın Münhen şəhəri ev sahibliyi edəcək.
Avropa Liqası 2024-cü il iyulun 11-də start götürüb 2025-ci il mayın 21-də yekunlaşacaq. Final İspaniyanın Bilbao şəhərinə təyin olunub.
Konfrans Liqası 2024-cü il iyulun 11-də başlayıb 2025-ci il mayın 28-də yekunlaşacaq. Final matçı Polşanın Vrotslav şəhərində keçiriləcək.
