Çempionlar Liqasının ilkin heyəti
UEFA-nın baş klub turniri olan Çempionlar Liqasının 2024-2025 mövsümündə əsas raund 36 komandalıq vahid liqa sistemi ilə oynanacaq, komandalar 8 matç (4-ü evdə, 4-ü səfərdə) keçirəcək, ilk 8 pilləni tutan komandalar 1/8 finala, 9-24-cü yerləri tutan komandalar 1/16 finala adlayacaq.
Reqlamentə görə, 29 komanda liqa raunduna birbaşa vəsiqə alır, 5 bilet dörd mərhələdən ibarət çempionlar yolu ilə, 2 bilet üç mərhələdən ibarət liqalar yolu ilə əldə olunur.
Birinci mərhələdə ələnən komandalar Konfrans Liqasına, sonrakı mərhələlərdə ələnənlər Avropa Liqasına köçür.
Mayın 2-dək liqa mərhələsinə birbaşa vəsiqəni bu komandalar təmin edib: İngiltərədən “Arsenal”, “Mançester Siti”, İspaniyadan “Real”, Almaniyadan “Bayer”, “Bavariya”, “Ştutqart”, “Leypsiq”, “Borussiya” (Dortmund), İtaliyadan “İnter”, Fransadan PSJ, Niderlanddan PSV, “Feyenoord”.
İkinci mərhələnin çempionlar yolunda Norveçdən “Bode-Qlimt”, İsveçdən “Malmö” var.
Macarıstandan “Ferensvaroş”, Rumıniyadan “Styaua”, Slovakiyadan “Slovan”, Azərbaycandan “Qarabağ”, Qazaxıstandan “Ordabası”, Sloveniyadan “Selye”, Latviyadan RFS, İrlandiyadan “Şemrok Rovers”, Finlandiyadan HİK, Litvadan “Panevejis”, Belarusdan “Dinamo” (Minsk), Farer adalarından “Klaksvik”, Şimali İrlandiyadan “Larn”, Maltadan “Hamrun”, Gürcüstandan “Dinamo” (Batumi), Estoniyadan “Flora”, İslandiyadan “Vikinqur”, Uelsdən “Nyu Sents”, San Marinodan “Virtus” çempionlar yolunun ilk mərhələsində start götürür.
Portuqaliyadan “Sportinq”, “Benfika”, Şotlandiyadan “Seltik”, “Reyncers”, Serbiyadan “Srvena Zvezda”, Türkiyədən “Qalatasaray”, “Fənərbaxça”nın turnirdə oynayacağı dəqiqləşib.
