Naxçıvan hökumətində yeni başçı
Aprelin 25-də Naxçıvan Muxtar Respublikası Ali Məclisinin sessiyası keçirilib. Rəsmi məlumata görə, prezident İlham Əliyevin təqdimatına baxılan sessiyada Ceyhun Cəlilov muxtar respublikanın baş naziri təyin edilib.
1987-ci il təvəllüdlü Ceyhun Cəlilov bu təyinata qədər Naxçıvan Muxtar Respublikasının əmək və əhalinin sosial müdafiəsi naziri postunu tuturdu.
2020-ci il mayın 25-dən Səbuhi Məmmədov baş nazir idi.
Naxçıvan Muxtar Respublikasının ali vəzifəli şəxsi Ali Məclisin sədridir. 2022-ci il dekabrın 21-dən bu kürsü boşdur.
Ali Məclis majoritar sistemlə (dairələrdən) seçilən 45 deputatdan ibarətdir.
Muxtar respublikanın Nazirlər Kabinetinin tərkibinə baş nazir, onun müavinləri, Naxçıvan Muxtar Respublikasının nazirləri və başqa mərkəzi icra hakimiyyəti orqanlarının rəhbərləri daxildir. Kabinetin tərkibini baş nazirin təklifi ilə Ali Məclis təsdiqləyir.
2022-ci il dekabrın 22-də Naxçıvan Muxtar Respublikasında prezidentin səlahiyyətli nümayəndəliyi təsis olunub, Fuad Nəcəfli səlahiyyətli nümayəndə təyin edilib. Səlahiyyətli nümayəndə Naxçıvan Muxtar Respublikasının ərazisində prezidenti təmsil edən vəzifəli şəxsdir və dövlət başçısının müəyyən etdiyi səlahiyyətləri həyata keçirir. Mərkəzi və yerli icra hakimiyyəti orqanları və digər dövlət qurumları Naxçıvan Muxtar Respublikasının ərazisində fəaliyyətlərini səlahiyyətli nümayəndə ilə əlaqələndirilmiş qaydada həyata keçirməlidir.
