“Avroviziya 2024” şansları
İsveçin Malmö şəhərində keçiriləcək “Avroviziya 2024” beynəlxalq mahnı müsabiqəsinə 37 ölkə qatılır. Yarışın ilk yarımfinalı mayın 7-nə, ikinci yarımfinalı mayın 9-na, finalı mayın 11-nə təyin olunub.
Bukmeker kontorlarında pul qoyuluşu statistikasına əsaslanan Eurovisionworld.com saytı mümkün qalib kimi 25 faizlə İsveçrəni göstərir.
Xorvatiya reytinqdə 17 faiz, Niderland 15 faiz, İtaliya 10 faiz, Ukrayna 5 faiz şansla yer alır.
Fransa zəfərə 4 faiz, İsrail, Yunanıstan, İrlandiya və Belçika 2 faiz şanslı sayılır.
Hesabata görə, qalan ölkələrin qələbə şansı 1 faiz və daha aşağıdır.
Azərbaycanı “Avroviziya 2024”də Fəxri İsmayılov və İlkin Dövlətov təmsil edəcək.
İlk yarımfinalda Avstraliya, Azərbaycan, Finlandiya, Xorvatiya, İrlandiya, İslandiya, Kipr, Litva, Lüksemburq, Moldova, Polşa, Portuqaliya, Serbiya, Sloveniya, Ukrayna, ikinci yarımfinalda Albaniya, Avstriya, Belçika, Çexiya, Danimarka, Ermənistan, Estoniya, Gürcüstan, İsrail, İsveçrə, Latviya, Malta, Niderland, Norveç, San Marino, Yunanıstan mübarizə aparacaq.
Almaniya, Böyük Britaniya, Fransa, İspaniya, İsveç, İtaliya finala birbaşa vəsiqə alıb.
İctimai teleradioları cəmləyən Avropa Yayım Birliyinin 1956-cı ildən keçirdiyi “Avroviziya”da İrlandiya və İsveç 7, Niderland, Fransa, Lüksemburq və Böyük Britaniya 5, İsrail 4, Danimarka, İtaliya, Norveç və Ukrayna 3, İsveçrə, Avstriya, İspaniya və Almaniya 2, Monako, Belçika, Yuqoslaviya, Estoniya, Latviya, Türkiyə, Yunanıstan, Finlandiya, Serbiya, Rusiya, Azərbaycan və Portuqaliya 1 dəfə qalib gəlib.
Azərbaycan 13 yarışda finala çıxıb. 2008-ci ildə Elnur Hüseynov və Samir Cavadzadə 8-ci yeri, 2009-cu ildə Aysel Teymurzadə və Araş 3-cü yeri, 2010-cu ildə Səfurə Əlizadə 5-ci yeri, 2011-ci ildə Nigar Camal və Eldar Qasımov 1-ci yeri, 2012-ci ildə Səbinə Babayeva 4-cü yeri, 2013-cü ildə Fərid Məmmədov 2-ci yeri, 2014-cü ildə Dilarə Kazımova 22-ci yeri, 2015-ci ildə Elnur Hüseynov 12-ci yeri, 2016-cı ildə Səmra Rəhimli 17-ci yeri, 2017-ci ildə Diana Hacıyeva 14-cü yeri, 2019-cu ildə Çingiz Mustafayev 8-ci yeri, 2021-ci ildə Samirə Əfəndi 20-ci yeri, 2022-ci ildə Nadir Rüstəmli 16-cı yeri tutub.
2018-ci ildə Aysel Məmmədova, 2023-cü ildə Tural və Turan Bağmanovlar yarımfinalda ələniblər.
