Finiş havası
UEFA-nın klub turnirlərində 2023-2024 mövsümü finişə üz tutub: yarımfinal mərhələsində olan Çempionlar Liqası, Avropa Liqası və Konfrans Liqasının hər birində 4 komanda yer alır. İtaliya və Almaniya turnirlərdə 3, Fransa 2, İngiltərə, İspaniya, Belçika və Yunanıstan 1 komanda ilə təmsil olunur.
Avropa Liqasının yarımfinalçıları arasında qrup mərhələsində və 1/8 finalda Azərbaycanın “Qarabağ” komandasına rəqib olmuş “Bayer” (Almaniya) də var. Əvvəlki mövsümlərin beşində “Qarabağ”la çarpışmış komanda finala çıxıb: Avropa Liqasının 2014-2015 mövsümündə “Qarabağ”la eyni qrupda yarışmış “Dnepr” (Ukrayna) komandası həmin mövsüm finalda oynayıb; Çempionlar Liqasının 2017-2018 mövsümündə “Qarabağ”la eyni qrupda mübarizə aparmış “Atletiko” (İspaniya) Avropa Liqasına ələnib və finala çıxaraq turnirin qalibi olub; Avropa Liqasının 2018-2019 mövsümündə “Qarabağ”la eyni qrupda oynamış “Arsenal” (İngiltərə) komandası finala çıxa bilib; Avropa Liqasının 2019-2020 mövsümündə “Qarabağ”la eyni qrupda yer almış “Sevilya” (İspaniya) finala qədər gedərək zəfər kubokunu başı üzərinə qaldırıb; Avropa Liqasının 2020-2021 mövsümündə “Qarabağ”la eyni qrupda oynamış İspaniya “Vilyarreal”ı finala çıxaraq turnirin qalibi olub.
Azərbaycan 55 üzvü olan UEFA-nın klub reytinqində 27-ci pillədə göstərilir. Reytinq son beş mövsümdə qazanılan əmsala əsaslanır. Təsnifat mərhələlərində qələbə 1 xal, heç-heçə yarım xal, sonrakı raundlarda qələbə 2 xal, heç-heçə 1 xaldır. Qrup mərhələsindən finaladək bonus xalları da var. Toplanan xallar qitə turnirlərinə vəsiqə almış ölkə klublarının sayına bölünür və mində bir dəqiqliklə əmsal çıxarılır. Azərbaycan bu mövsüm 5,875 əmsal əldə edib.
1955-ci ildən keçirilən, 1991-ci ilə qədər Çempionlar kuboku adlanmış Çempionlar Liqasında “Real” 14, “Milan” 7, “Bavariya” və “Liverpul” 6, “Barselona” 5, “Ayaks” 4, “İnter” (İtaliya) və “Mançester Yunayted” 3, “Benfika”, “Nottingem Forest”, “Yuventus”, “Portu” və “Çelsi” 2, “Seltik”, “Feyenoord”, “Aston Villa”, “Hamburq”, “Styaua”, PSV, “Srvena Zvezda”, “Marsel”, “Borussiya” (Dortmund) və “Mançester Siti” 1 titula sahibdir.
1971-ci ildən keçirilən, 2008-ci ilədək UEFA kuboku adlanmış Avropa Liqasında “Sevilya” 7, “Liverpul”, “Yuventus”, “İnter” (İtaliya) və “Atletiko” 3, “Tottenhem”, “Feyenoord”, “Borussiya” (Mönhenqladbah), “Ayntraxt” (Frankfurt), “Höteborq”, “Real”, “Parma”, “Portu” və “Çelsi” 2, PSV, “İpsviç”, “Anderlext”, “Bayer”, “Napoli”, “Ayaks”, “Bavariya”, “Şalke”, “Qalatasaray”, “Valensiya”, SSKA (Rusiya), “Zenit”, “Şaxtyor” (Ukrayna), “Mançester Yunayted” və “Vilyarreal” 1 uğur qazanıb.
2021-ci ildən keçirilən Konfrans Liqasında “Roma” və “Vest Hem”in 1 zəfəri var.
