Neftsiz ixracın detalları
İqtisadi İslahatların Təhlili və Kommunikasiya Mərkəzinin hesabatına görə, 2024-cü ilin yanvar-fevral aylarında Azərbaycandan 455 milyon ABŞ dolları dəyərində qeyri-neft məhsulu ixrac olunub, elektrik enerjisi ixracı 34,9 milyon dollarla birinci, pambıq mahlıcı ixracı 33,5 milyon dollarla ikinci, pomidor (tomat) ixracı 30 milyon dollarla üçüncü yerdə qərar tutub.
Neftsiz ixracın əsas ünvanları belə sıralanır: Rusiya (154,4 milyon dollar), Türkiyə (97,3 milyon dollar), Gürcüstan (42,9 milyon dollar), Ukrayna (18,2 milyon dollar), Qırğızıstan (18,2 milyon dollar).
Dövlət Gömrük Komitəsi bildirir ki, yanvar-fevral aylarında 138 ölkə ilə ticarət əməliyyatı aparılıb, ixrac 4,7 milyard dolları, idxal 2,4 milyard dolları ötüb. Qeyri-neft/qaz sektorunda meyvə-tərəvəz ixracı 99,4 milyon dollar, plastmas və ondan hazırlanan məmulatlar ixracı 57,05 milyon dollar, kimya sənayesi məhsulları ixracı 48,3 milyon dollarla ilk üçlükdə göstərilib.
