10 ölkə, 24 komanda
UEFA-nın klub turnirlərində 2023-2024 mövsümünü 24 komanda davam etdirir: 1/4 final mərhələsində olan Çempionlar Liqası, Avropa Liqası və Konfrans Liqasının hər birində 8 komanda yer alır. Rusiya turnirlərdən kənardır, 44 UEFA üzvünün, o cümlədən Azərbaycanın təmsilçisi qalmayıb.
Çempionlar Liqasındakı 5 komandanın turnirdə zəfəri var. 1955-ci ildən keçirilən, 1991-ci ilə qədər Çempionlar kuboku adlanmış yarışda “Real” 14, “Bavariya” 6, “Barselona” 5, “Borussiya” (Dortmund) və “Mançester Siti” 1 titul əldə edib.
Avropa Liqasında yer alan 2 komanda turnirə möhür vurub. 1971-ci ildən keçirilən, 2008-ci ilədək UEFA kuboku adlanmış yarışda “Liverpul” 3, “Bayer” 1 uğur qazanıb.
2021-ci ildən keçirilən Konfrans Liqasının qalibləri “Roma” və “Vest Hem” Avropa Liqasında yarışır.
Azərbaycan 55 üzvü olan UEFA-nın klub reytinqində 27-ci pillədə göstərilir. Reytinq turnirlərin son beş mövsümündə qazanılan əmsala əsaslanır. Təsnifat mərhələlərində qələbə 1 xal, heç-heçə yarım xal, sonrakı raundlarda qələbə 2 xal, heç-heçə 1 xaldır. Qrup mərhələsindən finaladək bonus xalları da var. Toplanan xallar qitə turnirlərinə vəsiqə almış ölkə klublarının sayına bölünür və mində bir dəqiqliklə əmsal çıxarılır. Azərbaycan bu mövsüm 5,875 əmsal əldə edib.
