İddiaçılar dəqiqləşir
ABŞ prezidentliyinə əsas iddiaçılar dəqiqləşir. Martın 13-nə olan məlumata görə, Demokratlar Partiyasından iddiaçı, dövlət başçısı Cozef Bayden və Respublikaçılar Partiyasından iddiaçı, sabiq prezident Donald Tramp ilkin seçkilərdə minimum nümayəndə həddini aşıblar.
Partiyaların prezidentliyə rəsmi namizədi qurultaylarda təsdiqlənməlidir. Demokratlar üçün minimum nümayəndə həddi 1968, respublikaçılar üçün 1215-dir.
Prezident seçkisinin ilk raundu noyabrın 5-də keçiriləcək. Həmin gün 50 ştat və 1 federal dairədən xüsusi nümayəndələr – Seçicilər Kollegiyası seçilməlidir. Ümumxalq səsverməsindən sonra Seçicilər Kollegiyası prezidenti seçməli, bu barədə qərar Konqresin (Nümayəndələr Palatası və Senat) iclasında təsdiqlənməlidir.
Prezident seçilmək üçün 538 nümayəndədən 270-nin səsini qazanmaq lazımdır.
Cozef Bayden 1942-ci il noyabrın 20-də doğulub. Delaver Universitetini və Sirakus Universitetinin Hüquq Məktəbini bitirib.
1972, 1978, 1984, 1990, 1996, 2002 və 2008-ci illərdə Senatın üzvü seçilib.
1987-1995-ci illərdə Senatın Məhkəmə Komitəsinə, 2001-2003 və 2007-2009-cu illərdə Xarici Əlaqələr Komitəsinə sədrlik edib.
2009-2017-ci illərdə vitse-prezident postunu tutub, 2021-ci il yanvarın 20-dən prezidentdir.
Donald Tramp 1946-cı il iyunun 14-də doğulub. Pensilvaniya Universitetinin Uorton Biznes Məktəbini bitirib. 1999-cu ildə Respublikaçılar Partiyasına qoşulub. 2017-ci il yanvarın 20-dən 2021-ci il yanvarın 20-dək prezidentlik edib.
ABŞ Konstitusiyasına görə, eyni şəxs yalnız iki dəfə prezident seçilə bilər.
