Yeni təyinatlar
Martın 7-də sərəncam imzalayan dövlət başçısı İlham Əliyev Elçin Yusubovu Xankəndi şəhərində, Ağdərə və Xocalı rayonlarında prezidentin xüsusi nümayəndəsi təyin edib. Başqa sərəncamla Emin Hüseynov Ağdam, Füzuli və Xocavənd rayonlarında xüsusi nümayəndə postuna keçirilib. Emin Hüseynov 2021-ci il mayın 24-dən Ağdam rayonunun işğaldan azad edilmiş hissəsində (Ağdam şəhəri daxil olmaqla) xüsusi nümayəndə olmuş, həmin il dekabrın 1-də Qarabağın işğaldan azad edilmiş ərazilərində (Şuşa rayonu istisna olmaqla) xüsusi nümayəndə postuna təyinat almışdı.
19 yanvar 2021-ci ildə yaradılan prezidentin xüsusi nümayəndəlikləri Prezident Administrasiyasının struktur bölməsi sayılır.
Hazırda daha üç xüsusi nümayəndə var: Aydın Kərimov Şuşa rayonuna, Vahid Hacıyev Cəbrayıl, Qubadlı və Zəngilan rayonlarına, Məsim Məmmədov Laçın rayonuna məsuldur.
Ermənistan 1988-1994-cü illərin təcavüzündə Azərbaycanın Xankəndi şəhərini, Şuşa, Xocalı, Laçın, Kəlbəcər, Qubadlı, Zəngilan rayonlarını tam, Xocavənd, Ağdərə, Ağdam, Füzuli, Cəbrayıl rayonlarını qismən işğal edib, həmçinin Sədərək rayonunun Kərki, Qazax rayonunun Aşağı Əskipara, Bağanıs Ayrım, Barxudarlı, Xeyrimli, Qızılhacılı, Sofulu, Yuxarı Əskipara kəndlərini ələ keçirib, Qarabağda separatçı rejim qurub.
2020-ci il sentyabrın 27-dən noyabrın 10-dək Azərbaycanın apardığı savaş nəticəsində Cəbrayıl, Füzuli, Zəngilan, Qubadlı, Ağdam, Kəlbəcər, Laçın rayonları tam, Şuşa, Xocavənd, Xocalı, Ağdərə rayonları qismən azad olunub.
2023-cü il sentyabrın 19-da Azərbaycan Xankəndi, Xocalı, Ağdərə, Xocavənd şəhərləri, Şuşa, Xocalı, Xocavənd və Ağdərə rayonlarının bir hissəsinə nəzarət edən işğalçı rejimə qarşı hərbi əməliyyata başlayıb, ertəsi gün rejim tərksilah olmaq öhdəliyi götürüb, sentyabrın 28-də özünü buraxıb.
