Türkiyədə illik inflyasiya 67 faizi ötür
Fevralda Türkiyədə istehlak qiymətləri 2023-cü ilin eyni ayına nəzərən 67,07 faiz yüksəlib. Hesabatı yayan Statistika Qurumu bildirir ki, 143 əsas mal, məhsul və xidmətin 125-də bahalaşma, 12-də ucuzlaşma qeydə alınıb, 6-da qiymət dəyişməyib.
Martın 5-i Türkiyədə ABŞ dollarının rəsmi kursu 31,4 lirəni ötüb. Azərbaycan Mərkəzi Bankı isə 100 Türkiyə lirəsini 5 manat 38 qəpiyə təklif edir. Bu, ilin siftə məzənnəsindən 33 qəpik aşağı göstəricidir.
2021-2023-cü illərdə 100 lirənin rəsmi qiyməti 22 manat 91 qəpikdən 5 manat 76 qəpiyə düşüb, 2024-cü il 5 manat 71 qəpiklə başlayıb.
Türkiyənin Mərkəzi Bankı lirənin dəyər itirməsini dayandırmaq üçün uçot dərəcəsini (banklara verilən borclar üzrə faiz dərəcəsi) davamlı artırır. 2023-cü il iyunun 22-dən 2024-cü il yanvarın 25-dək uçot dərəcəsi 8,5 faizdən 45 faizə qaldırılıb.
