Ədliyyə Nazirliyində yeni rəhbər
Fərid Turab oğlu Əhmədov ədliyyə naziri təyin edilib. Prezident İlham Əliyev sərəncamı fevralın 27-də imzalayıb.
1979-cu il təvəllüdlü Fərid Əhmədov Bakı Dövlət Universitetinin beynəlxalq hüquq fakültəsində bakalavr və magistr təhsili alıb, həmçinin Böyük Britaniyada beynəlxalq insan hüquqları üzrə oxuyub, Azərbaycan Milli Elmlər Akademiyasının aspirantı olub. Hüquq üzrə fəlsəfə doktorudur.
Bakı Dövlət Universitetində, Oksford Universitetində (Böyük Britaniya), ADA Universitetində elmi-pedaqoji fəaliyyət göstərib, Azərbaycan Universitetinin rektoru olub, rəqəmsal inkişaf və nəqliyyat nazirinin müavini postunu tutub.
Fevralın 16-da Fikrət Məmmədov ədliyyə naziri kürsüsünü itirmiş, nazir səlahiyyətləri nazir müavini Azər Cəfərova ötürülmüşdü.
Ədliyyə Nazirliyi 1918-ci ildə təsis edilib. 1920-ci ildə nazirlik ləğv olunub, Xalq Ədliyyə Komissarlığı yaradılıb. 1930-cu ildə komissarlıq buraxılıb, 1933-1959-cu illərdə yenidən fəaliyyət göstərib, 1970-ci ildə bir daha Ədliyyə Nazirliyi qurulub.
