Xocalı ziyarəti
Prezident İlham Əliyev fevralın 26-sı Xocalıda soyqırımı memorialının təməlini qoyub, rayon ictimaiyyətinin nümayəndələri ilə görüşüb, şəhərdə aparılan tikinti işləri ilə tanış olub, sonra Xankəndiyə baş çəkib.
Azərbaycanın Qarabağ bölgəsindəki Xocalı şəhərini 1992-ci il fevralın 26-da ermənilər işğal edib. Xankəndidə yerləşmiş Rusiya hərbi alayının da iştirak etdiyi istilada 613 nəfər öldürülüb.
Bosniya və Herseqovina, Cibuti, Çexiya, Əfqanıstan, Honduras, İndoneziya, İordaniya, Kolumbiya, Qvatemala, Meksika, Pakistan, Panama, Paraqvay, Peru, Sloveniya, Şotlandiya, Sudanın qanunverici orqanları, İslam Əməkdaşlıq Təşkilatı, Türk Dövlətləri Təşkilatı Xocalı qırğınını soyqırımı kimi tanıyan sənədlər qəbul edib.
ABŞ-ın 23 ştatının müxtəlif instansiyalarında da analoji sənədlər rəsmiləşib.
Ermənistan 1988-1994-cü illərin təcavüzündə Azərbaycanın Xankəndi şəhərini, Şuşa, Xocalı, Laçın, Kəlbəcər, Qubadlı, Zəngilan rayonlarını tam, Xocavənd, Ağdərə, Ağdam, Füzuli, Cəbrayıl rayonlarını qismən işğal edib, həmçinin Sədərək rayonunun Kərki, Qazax rayonunun Aşağı Əskipara, Bağanıs Ayrım, Barxudarlı, Xeyrimli, Qızılhacılı, Sofulu, Yuxarı Əskipara kəndlərini ələ keçirib, Qarabağda separatçı rejim qurub.
2020-ci il sentyabrın 27-dən noyabrın 10-dək Azərbaycanın apardığı savaş nəticəsində Cəbrayıl, Füzuli, Zəngilan, Qubadlı, Ağdam, Kəlbəcər, Laçın rayonları tam, Şuşa, Xocavənd, Xocalı, Ağdərə rayonları qismən azad olunub.
2023-cü il sentyabrın 19-da Azərbaycan Xankəndi, Xocalı, Ağdərə, Xocavənd şəhərləri, Şuşa, Xocalı, Xocavənd və Ağdərə rayonlarının bir hissəsinə nəzarət edən işğalçı rejimə qarşı hərbi əməliyyata başlayıb, ertəsi gün rejim tərksilah olmaq öhdəliyi götürüb, sentyabrın 28-də özünü buraxıb.
