Qələbə faizi
Mərkəzi Seçki Komissiyası fevralın 7-də keçirilmiş prezident seçkisinin rəsmi nəticələrini bəyan edib. Məlumata görə, dövlət başçısı, Yeni Azərbaycan Partiyasının sədri İlham Əliyev 92,12 faiz səslə qalib gəlib. Qalan səslər 6 namizəd (Milli Məclisin insan hüquqları komitəsinin sədri, Sosial Tədqiqatlar Mərkəzinin İdarə Heyətinin sədri Zahid Oruc, Milli Məclisin mədəniyyət komitəsinin sədri, Böyük Quruluş Partiyasının başqanı Fazil Mustafa, Milli Məclisin hüquq siyasəti və dövlət quruculuğu komitəsi sədrinin müavini, Bütöv Azərbaycan Xalq Cəbhəsi Partiyasının sədri Qüdrət Həsənquliyev, Milli Məclisin üzvü, Milli Cəbhə Partiyasının sədri Razi Nurullayev, Böyük Azərbaycan Partiyasının sədri Elşad Musayev, Vətəndaş Hüquqlarının Müdafiəsinə Dəstək İctimai Birliyinin sədri Fuad Əliyev) arasında bölünüb.
Seçkinin qəti nəticələrini Konstitusiya Məhkəməsi təsdiqləməli, bundan sonra andiçmə mərasimi keçirilməlidir.
1961-ci il dekabrın 24-ü Bakıda doğulan İlham Əliyev Moskva Dövlət Beynəlxalq Münasibətlər İnstitutunu və həmin təhsil ocağının aspiranturasını bitirib, orada müəllimlik eləyib. Tarix elmləri namizədidir.
1991-ci ildən Moskvada özəl şirkətə rəhbərlik edib.
1994-cü ildə Azərbaycan Dövlət Neft Şirkətinin vitse-prezidenti, 1996-cı ildə birinci vitse-prezidenti təyin olunub.
1995 və 2000-ci illərdə Milli Məclisin deputatı seçilib.
2003-cü il avqustun 4-də baş nazir vəzifəsinə gətirilib, həmin il oktyabrın 15-də və 2008-ci ilin eyni günündə prezident mandatı alıb.
2009-cu ildə eyni şəxsin ardıcıl iki dəfədən çox prezident seçilməsinə yasaq götürülüb və İlham Əliyev 2013-cü il oktyabrın 9-da üçüncü dəfə dövlət başçısı seçilib.
2016-cı ildə prezidentin səlahiyyət müddəti 5 ildən 7 ilə qaldırılıb, 2018-ci il aprelin 11-də İlham Əliyev yenə prezident seçkisini udub, 2023-cü il dekabrın 7-də növbədənkənar prezident seçkisinə sərəncam verib.
