Gürcüstanın yeni hökuməti rəsmiləşib
Gürcüstan parlamenti fevralın 8-də yeni hökumətə etimad göstərib, ardınca hakim Gürcü Arzusu – Demokratik Gürcüstan Partiyasından İrakli Kobaxidze baş nazir təyin olunub. 1978-ci il təvəllüdlü İrakli Kobaxidze hüquqşünas alimdir. 2016-2019-cu illərdə parlament sədri olub, 2021-ci ildən 2024-cü il fevralın 1-dək hakim partiyaya liderlik edib.
Hökumətə xarici işlər; müdafiə; ədliyyə; daxili işlər; maliyyə; iqtisadiyyat və davamlı inkişaf; ətraf mühit və kənd təsərrüfatı; regional inkişaf və infrastruktur; məcburi köçkünlərlə iş, əmək, səhiyyə və sosial müdafiə; təhsil, elm və gənclər; mədəniyyət və idman nazirləri; barışıq məsələləri və vətəndaş bərabərliyi üzrə dövlət naziri daxildir.
Əvvəlki baş nazir İrakli Qaribaşvili yanvarın 29-da istefa verib, fevralın 1-də Gürcü Arzusu – Demokratik Gürcüstan Partiyasının sədri seçilib.
Gürcüstanda hökuməti 150 yerlik parlamentdə çoxluq əldə edən partiya formalaşdırır. Gürcü Arzusu – Demokratik Gürcüstan Partiyası 2012, 2016 və 2020-ci illərin parlament seçkilərində qalib gələrək hökumət qurub.
