ABŞ prezidentliyinə iddiaçılar
Novator.az ABŞ prezidentliyinə iddiaçıların siyahısına nəzər salıb.
Prezident seçkisinin ilk raundu 2024-cü il noyabrın 5-də keçiriləcək. Həmin gün 50 ştat və 1 federal dairədən xüsusi nümayəndələr – Seçicilər Kollegiyası seçilməlidir. Ümumxalq səsverməsindən sonra Seçicilər Kollegiyası prezidenti seçməli, bu barədə qərar Konqresin (Nümayəndələr Palatası və Senat) iclasında təsdiqlənməlidir.
Prezident seçilmək üçün 538 nümayəndədən 270-nin səsini qazanmaq lazımdır.
Demokratlar Partiyasından prezidentliyə üç iddiaçı var: dövlət başçısı Cozef Bayden, yazıçı və siyasətçi Marianna Uilyamson, siyasətçi, konqresmen Din Fillips.
1942-ci il təvəllüdlü Cozef Bayden 7 dəfə Senatın üzvü seçilib. 2009-2017-ci illərdə vitse-prezident postunu tutub.
2020-ci il noyabrın 3-də keçirilmiş ümumxalq səsverməsində Seçicilər Kollegiyasına 306 nümayəndə qazanıb. Seçicilər Kollegiyasındakı 14 dekabr 2020-ci il səsverməsi də eyni nəticə ilə yekunlaşıb. 2021-ci il yanvarın 7-də Senatın və Nümayəndələr Palatasının birgə iclasında Seçicilər Kollegiyasındakı səsvermənin nəticəsi – Cozef Baydenin prezident seçilməsi təsdiqlənib. Yanvarın 20-də Cozef Bayden and içərək prezident səlahiyyətlərinin icrasına başlayıb.
1952-ci il təvəllüdlü Marianna Uilyamson müharibə əleyhdarı, xeyriyyəçi kimi ad çıxarıb.
1969-cu il təvəllüdlü Din Fillips desert və spirtli içkilər biznesində pay sahibidir. 2019-cu ildən Nümayəndələr Palatasının üzvüdür.
Respublikaçılar Partiyasından iki iddiaçı qeydə alınıb: sabiq prezident Donald Tramp, siyasətçi Nikki Heyli.
1946-cı il təvəllüdlü Donald Tramp uzun illər tikinti biznesi ilə məşğul olub. 2017-2021-ci illərdə prezident postunu tutub.
1972-ci il təvəllüdlü Nikki Heyli Hindistan əsillidir (Nimrata Randxava). 2011-2017-ci illərdə Cənubi Karolina ştatının qubernatoru, 2017-2018-ci illərdə ölkənin BMT-dəki daimi nümayəndəsi olub.
Partiyaların prezidentliyə rəsmi namizədi qurultaylarda təsdiqlənməlidir.
