23-cü ilin xarici ticarəti
2023-cü ilin xarici ticarət statistikası açıqlanıb. Dövlət Gömrük Komitəsinin hesabatına görə, ixrac 33,8 milyard dolları, idxal 17,2 milyard dolları ötüb.
Yanvar və iyunda ixrac 1,8 milyard, fevralda 2,6 milyard, martda 3,2 milyard, apreldə 4,8 milyard, mayda 3,5 milyard, iyulda 2,8 milyard, avqustda 3,5 milyard, sentyabr və noyabrda 2,1 milyard, oktyabrda 2,8 milyard, dekabrda 2,3 milyard dolları üstələyib.
Yanvar, sentyabr və dekabrda idxal 1,4 milyard, fevral və apreldə 1,2 milyard, mart, iyun və iyulda 1,3 milyard, may, avqust və oktyabrda 1,5 milyard, noyabrda 1,6 milyard dollardan çox olub.
Məlumata əsasən, ixracın 4,9 faizi MDB ölkələrinə, 64,4 faizi Avropa İttifaqı ölkələrinə, 30,7 faizi başqa ölkələrə yönəlib, idxalda MDB-nin payı 27,6 faiz, Avropa İttifaqının payı 17,4 faiz, başqa ölkələrin payı 55 faiz həddində rəsmiləşib.
İxracda əsas üç tərəfdaş mövqeyində İtaliya, Türkiyə və İsrail, idxalda Rusiya, Çin və Türkiyə qərar tutub.
Novator.az bildirir ki, ixracın 90,1 faizi neft-qaz sektoruna aid olub, idxalda ən böyük pay maşın, mexanizm, elektrik aparatları, avadanlıqlar və onların hissələrini əhatə edib: 20,04 faiz.
3 milyard 348 milyon dollarlıq qeyri-neft məhsulu ixrac olunub. Meyvə-tərəvəz ixracı 725,9 milyon, plastmas və ondan hazırlanan məmulatlar ixracı 460,7 milyon, elektrik enerjisi ixracı 402,4 milyon dollarla ilk üçlükdə göstərilir.
Maşın, mexanizm, elektrik aparatları, avadanlıqlar və onların hissələri üzrə 3,4 milyard dollar, nəqliyyat vasitələri və onların hissələri üzrə 2,8 milyard dollar, yeyinti məhsulları üzrə 2,1 milyard dollarlıq idxal qeydə alınıb.
