Avropadan cərimələr
Avropa İnsan Hüquqları Məhkəməsi yanvarın 18-də Azərbaycandan şikayətlər üzrə qərar və qərardadlar elan edib. Aihmaz.org-un məlumatına görə, Azərbaycan dövləti Avropa İnsan Hüquqları Konvensiyası ilə tanınan müxtəlif hüquqları pozulan qurum və şəxslərə təzminat ödəməlidir. Müsavat Partiyası 3000 avro, partiyanın təmsilçisi 500 avro, ictimai fəallar Adnan Hacızadə və Emin Millinin hər biri 4700 avro, Eldəniz Hacıyev və Salman Abdullayevin hər biri 4400 avro, Aygün Mahmudova 4230 avro, İlqar Məmmədov, Amil Məmmədzadə, İslam Həsənov, Samir Həsənov, Vasif Müzəffərovun hər biri 1250 avro, Rüfət Səfərov 2850 avro, Məhəmməd Bağırov 4750 avro alacaq.
Dövlət 6 ərizəçinin hər birinə görə 2850 avro, 6 ərizəçinin hər birinə görə 1250 avro, 2 ərizəçinin hər birinə görə 1000 avro, 1 ərizəçiyə görə 5100 avro cərimələnib.
Fransanın Strasburq şəhərində yerləşən, hakimləri Avropa Şurasına üzv ölkələrdən seçilən Avropa Məhkəməsi Avropa İnsan Hüquqları Konvensiyasına riayət olunmasına nəzarət edir. Azərbaycan 1949-cu ildə yaradılmış Avropa Şurasına 2001-ci ildə qoşulub, 2002-ci ildən Avropa Məhkəməsinin təsir dairəsindədir.
