Yeni həbs, həmin ittiham
“Abzas Media” saytının əməkdaşı Elnarə Qasımova barəsində həbs qətimkan tədbiri seçilib. Qərarı yanvarın 15-də Xətai Rayon Məhkəməsi çıxarıb. Yanvarın 13-də tutulan jurnalistə qabaqcadan əlbir olan bir qrup şəxsin qaçaqmalçılıq törətməsi ittihamı irəli sürülüb. Saytın direktoru Ülvi Həsənli və onun köməkçisi Məhəmməd Kekalov 2023-cü il noyabrın 20-dən, baş redaktoru Sevinc Vaqifqızı noyabrın 21-dən, əməkdaşı Nərgiz Absalamova noyabrın 30-dan, bu media qurumu ilə əməkdaşlıq edən jurnalist, “Turan” informasiya agentliyinin iqtisadiyyat şöbəsinin redaktoru Hafiz Babalı dekabrın 13-dən eyni ittihamla həbsdədirlər.
“Kanal 13” internet televiziyasının direktoru Əziz Orucov 2023-cü il noyabrın 27-də tutulub. Ona əvvəlcə mülkiyyət, istifadə və ya icarə hüququ olmadan torpaq sahəsi üzərində özbaşına tikinti aparma ittihamı verilib, sonra işə qabaqcadan əlbir olan bir qrup şəxsin qaçaqmalçılıq törətməsi ittihamı əlavə edilib.
“Kanal 13”lə əməkdaşlıq edən jurnalist Şamo Eminov 2023-cü il dekabrın 22-də tutulub. O da qabaqcadan əlbir olan bir qrup şəxsin qaçaqmalçılıq törətməsində təqsirli bilinir.
