Prezidentliyə namizədlər
Fevralın 7-si Azərbaycanda prezident seçkisi keçiriləcək. Novator.az bildirir ki, Mərkəzi Seçki Komissiyası 7 nəfərin namizədliyini qeydə alıb:
İlham Əliyev
1961-ci il dekabrın 24-də doğulub. Moskva Dövlət Beynəlxalq Münasibətlər İnstitutunu (Rusiya) və həmin təhsil ocağının aspiranturasını bitirib. Azərbaycan Dövlət Neft Şirkətinin vitse-prezidenti, birinci vitse-prezidenti, Milli Məclisin deputatı, ölkənin baş naziri olub. 2003, 2008, 2013 və 2018-ci illərdə prezident seçilib. Yeni Azərbaycan Partiyasının sədridir.
Elşad Musayev
1963-cü il sentyabrın 5-də doğulub. Bakı Dövlət Universitetinin hüquq fakültəsini bitirib. Böyük Azərbaycan Partiyasının sədridir.
Qüdrət Həsənquliyev
1965-ci il yanvarın 29-da doğulub. Bakı Dövlət Universitetinin hüquq fakültəsini bitirib. Bütöv Azərbaycan Xalq Cəbhəsi Partiyasının sədri, Milli Məclisin hüquq siyasəti və dövlət quruculuğu komitəsi sədrinin müavinidir.
Fazil Mustafa
1965-ci il oktyabrın 19-da doğulub. Bakı Dövlət Universitetinin hüquq fakültəsini bitirib. Böyük Quruluş Partiyasının başqanı, Milli Məclisin mədəniyyət komitəsinin sədridir.
Fuad Əliyev
1970-ci il aprelin 4-də doğulub. Azərbaycan Dillər Universitetini bitirib. Azərbaycan Liberal Demokrat Partiyasının (2023-cü ildə fəaliyyətini dayandırıb) sədri olub.
Razi Nurullayev
1971-ci il aprelin 1-də doğulub. Azərbaycan Dillər Universitetinin ingilis-fransız dilləri pedaqoji fakültəsini və Cənubi Rusiya Humanitar İnstitutunun hüquq fakültəsini bitirib. Milli Cəbhə Partiyasının sədri, Milli Məclisin üzvüdür.
Zahid Oruc
1972-ci il fevralın 1-də doğulub. Azərbaycan Texniki Universitetinin avtomatika və hesablama texnikası fakültəsini bitirib. Milli Məclisin insan hüquqları komitəsinin sədri, Sosial Tədqiqatlar Mərkəzinin İdarə Heyətinin sədridir.
Səsvermədə iştirak etmiş seçicilərin yarısından çoxunun səsini alan namizəd prezident seçilmiş sayılır. Mərkəzi Seçki Komissiyası səsvermə günündən başlayaraq 10 gündən gec olmayan müddətdə prezident seçkisinə yekun vurur və nəticələrini təsdiq olunmaq üçün Konstitusiya Məhkəməsinə təqdim edir. Konstitusiya Məhkəməsinin bu haqda qərarı qətidir. Prezident seçilmiş şəxs seçkinin yekunları haqqında məlumatın rəsmi elan olunduğu gündən başlayaraq 3 gün ərzində and içir.
Azərbaycan prezident seçkisinə gedir
Prezidentliyə namizəd göstərmək hüquqlu partiyalar
