Yubileydə təltif
General-polkovnik Ramil Usubov “Şərəf” ordeni ilə təltif edilib. Dekabrın 25-də imzalanan prezident sərəncamında təltif Ramil Usubovun dövlət qulluğunda səmərəli fəaliyyəti ilə əsaslandırılıb.
Novator.az bildirir ki, dekabrın 22-də Ramil Usubovun 75 yaşı tamam olub.
1948-ci ildə Xocalıda doğulan Ramil Usubov Bakı Xüsusi Orta Milis Məktəbini və SSRİ Daxili İşlər Nazirliyinin Akademiyasını (Moskva) bitirib.
1970-ci ildən daxili işlər orqanlarında xidmət edib, Stepanakert (Xankəndi) və Şuşada məsul vəzifələr tutub, Dağlıq Qarabağ Muxtar Vilayəti Daxili İşlər İdarəsinin rəis müavini, Əli-Bayramlı Şəhər-Rayon Milis Şöbəsinin rəisi, Naxçıvan Muxtar Sovet Sosialist Respublikasının daxili işlər naziri, Azərbaycan Daxili İşlər Nazirliyinin Cinayət Axtarış İdarəsinin rəisi, Pasport İşləri, Viza və Qeydiyyat İdarəsinin rəisi, Kadrlar İdarəsinin şöbə rəisi, Naxçıvan Muxtar Respublikasının daxili işlər naziri olub.
1994-cü ildən Azərbaycanın daxili işlər naziri vəzifəsində xidmət etmiş Ramil Usubov 2019-cu ildən Təhlükəsizlik Şurasının katibidir.
“Azərbaycan Bayrağı”, 1-ci dərəcəli “Vətənə xidmətə görə”, “Şöhrət” ordenləri laureatıdır.
