“Qarabağ” yolunda
UEFA Avropa Liqasında Azərbaycanı təmsil edən “Qarabağ” 1/16 finalda (15-22 fevral 2024-cü il) Portuqaliyanın “Braqa” komandası ilə üz-üzə gələcək. Novator.az bildirir ki, 1925-ci ildə yaradılan “Braqa” 3 dəfə Portuqaliya kubokunu, 2 dəfə ölkənin liqa kubokunu qazanıb, 25 mövsüm UEFA-nın klub turnirlərinə vəsiqə alıb.
2023-2024 mövsümünə Çempionlar Liqasının birinci mərhələsində start verən “Qarabağ” ikinci raundda ilişərək Avropa Liqasına köçüb.
1951-ci ildə Ağdamda yaradılan “Qarabağ” (“Məhsul”, “Şəfəq”, “Kooperator” adları da daşıyıb) 1 dəfə Azərbaycan SSR-in, 10 dəfə müstəqil Azərbaycanın çempionu olub, 7 dəfə Azərbaycan kubokunu qazanıb.
“Qarabağ” 19-cu dəfədir UEFA-nın əsas klub turnirlərində yarışır, 2014-cü ildən başlayaraq təsnifat mərhələlərini keçib.
2014-2015, 2015-2016, 2016-2017, 2018-2019, 2019-2020, 2020-2021 mövsümlərinə Çempionlar Liqasında başlayan “Qarabağ” sonra Avropa Liqasına adlayaraq qrup mərhələsində mübarizə aparıb.
2017-2018 mövsümündə komanda Çempionlar Liqasının qrup mərhələsində oynayıb.
2021-2022-ci il mövsümündə “Qarabağ” Konfrans Liqasının 1/16 finalına qədər irəliləyib.
2022-2023 mövsümünə Çempionlar Liqasında başlayan “Qarabağ” əvvəl Avropa Liqasına adlayıb, sonra Konfrans Liqasına ələnib və 1/16 finalda uduzub.
