Arif Hacılının oğlu həbsdən çıxdı
Müsavat Partiyasının başqanı Arif Hacılının oğlu Orxan Hacılı ev dustaqlığına buraxılıb. Qərarı dekabrın 19-da Yasamal Rayon Məhkəməsi çıxarıb. Şərtə əsasən, Orxan Hacılı yaşayış yerini gün ərzində yalnız 3 saat tərk edə bilər.
Yasamal Rayon Polis İdarəsi Orxan Hacılını Cinayət Məcəlləsinin 263.1 və 264-cü maddələri ilə məsuliyyətə cəlb edib. Rəsmi iddiaya görə, Orxan Hacılının idarə etdiyi avtomobil oktyabrın 11-i Bakıda qəza törədib. hadisədə bir nəfər az ağır xəsarət alıb. Orxan Hacılı oktyabrın 31-də tutulmuş, noyabrın 2-də Yasamal Rayon Məhkəməsi onun barəsində iki aylıq həbs qətimkan tədbiri seçmişdi.
Novator.az bildirir ki, Cinayət Məcəlləsinin 263.1-ci maddəsinə görə, yol hərəkəti qaydalarının pozulması ehtiyatsızlıqdan zərərçəkmiş şəxsin sağlamlığına az ağır zərər vurulmasına səbəb olduqda 2 ilədək müddətə nəqliyyat vasitələrini idarə etmək hüququndan məhrum edilməklə 5 min manatdan 7 min manatadək miqdarda cərimə və ya 2 ilədək müddətə islah işləri və ya 2 ilədək müddətə azadlığın məhdudlaşdırılması və ya 2 ilədək müddətə azadlıqdan məhrumetmə ilə cəzalandırılır.
Cinayəti törətmiş şəxs zərərçəkmiş şəxslə barışdıqda və ona dəymiş ziyanı tamamilə ödədikdə cinayət məsuliyyətindən azad edilir.
264-cü maddəyə əsasən, yol hərəkəti qaydalarını pozan şəxsin hadisə yerindən qaçmasına 3 ilədək müddətə nəqliyyat vasitələrini idarə etmək hüququndan məhrum edilməklə 2 ilədək müddətə azadlığın məhdudlaşdırılması və ya 2 ilədək müddətə azadlıqdan məhrumetmə cəzası düşür.
1990-cı il təvəllüdlü Orxan Hacılı Vrotslav Universitetini (Polşa) bitirib. Müsavatçıdır.
Arif Hacılı milli azadlıq hərəkatının (1988-1991) öncül şəxslərindəndir. 1991-1992-ci illərdə Azərbaycan Xalq Cəbhəsinin Ali Məclisinə sədrlik edib. 1990-cı ildə parlamentin deputatı seçilib, Əbülfəz Elçibəyin prezidentliyi dövründə (1992-1993) ərazi hakimiyyət və idarəetmə orqanları ilə iş üzrə dövlət müşaviri postunu tutub.
1992-ci ildən Müsavatın katibi, 2001-ci ildən partiya başqanının müavini olub.
2003-2005 və 2011-2012-ci illərdə həbsdə yatıb.
2014 və 2019-cu illərdə başqan seçilib.
