Əziz Orucova yeni ittiham
“Kanal 13” internet televiziyasının direktoru Əziz Orucova əlavə ittiham irəli sürülüb: qabaqcadan əlbir olan bir qrup şəxsin qaçaqmalçılıq törətməsi. Xəbəri dekabrın 19-da “Turan” yayıb.
Noyabrın 27-də tutulan Əziz Orucova ilk ittiham mülkiyyət, istifadə və ya icarə hüququ olmadan torpaq sahəsi üzərində özbaşına tikinti aparmadır. Onun Bakının 20-ci sahə ərazisində qanunsuz ev tikdiyi iddia olunur.
“Abzas Media” internet nəşrinin direktoru Ülvi Həsənli və onun köməkçisi Məhəmməd Kekalov noyabrın 20-dən, baş redaktoru Sevinc Vaqifqızı noyabrın 21-dən, əməkdaşı Nərgiz Absalamova noyabrın 30-dan, bu nəşrlə əməkdaşlıq edən jurnalist, “Turan” informasiya agentliyinin iqtisadiyyat şöbəsinin redaktoru Hafiz Babalı dekabrın 13-dən həbsdədirlər. Onlara qabaqcadan əlbir olan bir qrup şəxsin qaçaqmalçılıq törətməsi ittihamı verilib. İstintaqı Bakı Şəhər Baş Polis İdarəsi aparır.
“Kanal 13”ün əməkdaşı Rüfət Muradlı dekabrın 2-də polisin qanuni tələbinə qəsdən tabe olmamaqda təqsirli bilinərək 30 sutka inzibati həbs cəzası alıb.
