24 ölkə, 64 komanda
UEFA Avropa Liqasının H qrupunda Azərbaycanı təmsil edən “Qarabağ” son oyununu keçirib. Dekabrın 14-ü Bakıda “Haken”lə (İsveç) görüşən komanda rəqibini üstələyib – 2:1.
“Bayer” (Almaniya) – “Molde” (Norveç) matçında 5:1 hesabı qeydə alınıb.
Novator.az bildirir ki, “Bayer” qrupda birinci yeri tutaraq 1/8 finala, “Qarabağ” ikinci yeri tutaraq 1/16 finala vəsiqə alıb, “Molde” üçüncü yeri tutaraq Konfrans Liqasının 1/16 finalına ələnib.
1/16 finalda “Qarabağ”ın potensial rəqibləri bunlardır: “Qalatasaray”, “Lans”, “Braqa”, “Benfika”, “Feyenoord”, “Milan”, “Yanq Boyz”, “Şaxtyor” (Ukrayna).
2023-2024 mövsümünə Çempionlar Liqasının birinci mərhələsində start verən “Qarabağ” ikinci raundda ilişərək Avropa Liqasına köçüb.
UEFA-nın klub turnirlərində mövsümü 64 komanda davam etdirir: Çempionlar Liqasında 16, Avropa Liqası və Konfrans Liqasının hər birində 24 komanda var.
Rusiya turnirlərdən kənardır, 30 UEFA üzvü təmsilçisiz qalıb, İtaliya və Fransa itki verməyib.
Çempionlar Liqasındakı 8 komandanın turnirdə zəfəri var. 1955-ci ildən keçirilən, 1991-ci ilə qədər Çempionlar kuboku adlanmış yarışda “Real” 14, “Bavariya” 6, “Barselona” 5, “İnter” (İtaliya) 3, “Portu” 2, PSV, “Borussiya” (Dortmund) və “Mançester Siti” 1 titul əldə edib.
Avropa Liqasında yer alan 6 komanda turnirə möhür vurub. 1971-ci ildən keçirilən, 2008-ci ilədək UEFA kuboku adlanmış yarışda “Liverpul” 3, “Feyenoord” 2, “Bayer”, “Qalatasaray”, “Şaxtyor” (Ukrayna) və “Vilyarreal” 1 uğur qazanıb.
2021-ci ildən keçirilən Konfrans Liqasında “Roma” və “Vest Hem”in 1 zəfəri var. Hər iki komanda Avropa Liqasında yarışır.
Azərbaycan 55 üzvü olan UEFA-nın klub reytinqində 28-ci pillədə göstərilir.
Reytinq turnirlərin son beş mövsümündə qazanılan əmsala əsaslanır. Təsnifat mərhələlərində qələbə 1 xal, heç-heçə yarım xal, sonrakı raundlarda qələbə 2 xal, heç-heçə 1 xaldır.
Qrup mərhələsindən finaladək bonus xalları da var.
Toplanan xallar qitə turnirlərinə vəsiqə almış ölkə klublarının sayına bölünür və mində bir dəqiqliklə əmsal çıxarılır.
Azərbaycan bu mövsüm 4,875 əmsal əldə edib.
