Həbs dalğası
Dekabrın 13-də tutulan “Turan” informasiya agentliyinin iqtisadiyyat şöbəsinin redaktoru Hafiz Babalıya qabaqcadan əlbir olan bir qrup şəxsin qaçaqmalçılıq törətməsi ittihamı irəli sürülüb. Hafiz Babalı “Abzas Media” internet nəşrinin əməkdaşı kimi də tanınır. Bu nəşrin direktoru Ülvi Həsənli və onun köməkçisi Məhəmməd Kekalov noyabrın 20-dən, baş redaktoru Sevinc Vaqifqızı noyabrın 21-dən, əməkdaşı Nərgiz Absalamova noyabrın 30-dan həbsdədirlər. Jurnalistlərə qabaqcadan əlbir olan bir qrup şəxsin qaçaqmalçılıq törətməsi ittihamı verilib. İstintaqı Bakı Şəhər Baş Polis İdarəsi aparır.
Noyabrın 27-də isə “Kanal 13” internet televiziyasının direktoru Əziz Orucov tutulub. Ona mülkiyyət, istifadə və ya icarə hüququ olmadan torpaq sahəsi üzərində özbaşına tikinti aparma ittihamı irəli sürülüb. Əziz Orucovun Bakının 20-ci sahə ərazisində qanunsuz ev tikdiyi iddia olunur.
“Kanal 13”ün əməkdaşı Rüfət Muradlı dekabrın 2-də polisin qanuni tələbinə qəsdən tabe olmamaqda təqsirli bilinərək 30 sutka inzibati həbs cəzası alıb.
