Akif Muradverdiyevə təzminat ödənəcək
Avropa İnsan Hüquqları Məhkəməsi dekabrın 14-də sabiq məmur Akif Muradverdiyevin Azərbaycan dövlətindən şikayəti üzrə qərar elan edib. Qərara görə, sabiq məmurun Avropa İnsan Hüquqları Konvensiyası ilə qorunan ədalətli məhkəmə araşdırması hüququna müdaxilə baş verib və ona 4 min avro təzminat ödənməlidir.
Xəbəri Aihmaz.org yayıb.
2005-ci ildə Akif Muradverdiyev prezidentin işlər müdiri vəzifəsindən çıxarılaraq həbs edilib, iqtisadi cinayətlər ittihamları ilə 6 il müddətinə azadlıqdan məhrum olunub, 2008-ci ildə Ali Məhkəmənin qərarı əsasında azadlığa buraxılıb.
2013-cü ildə sabiq məmur qaçaqmalçılıq ittihamı ilə tutularaq 4 il müddətinə azadlıqdan məhrum olunub, 2016-cı ildə əfv edilib. 2015-ci ildə bu işdən Avropa Məhkəməsinə şikayət verilib.
Fransanın Strasburq şəhərində yerləşən, hakimləri Avropa Şurasına üzv ölkələrdən seçilən Avropa Məhkəməsi Avropa İnsan Hüquqları Konvensiyasına riayət olunmasına nəzarət edir. Azərbaycan 1949-cu ildə yaradılmış Avropa Şurasına 2001-ci ildə qoşulub, 2002-ci ildən Avropa Məhkəməsinin təsir dairəsindədir.
